Home Uncategorized Despues di 10 aña luchando pe titulo maximo di futbol Deportivo Nacional...

Despues di 10 aña luchando pe titulo maximo di futbol Deportivo Nacional a titula campeon den Division Honor

SHARE

ORANJESTAD, Aruba – E campeonato di Division Honor di Arubaanse Voetbal Bond (AVB) a yega su final diamars anochi despues cu Deportivo Nacional a bay cu victoria di 3-1 riba SV RCA. Ambos team a subi tereno cu meta di bay cu e titulo principal di futbol.

Desde comienso di wega ambos team tabata busca pa habri e marcado y na 11 minuut di wega Davis Oliveros a anota e prome gol pa Deportivo Nacional. E wega a continua unda cu na diferente ocasion RCA tabata tira riba gol y no tabata por a anota. Den e di dos tempo RCA a subi tereno buscando gol di empate pero na 52 minuut di wega Kenroy Ranger a anota e di dos gol. Deportivo Nacional a comete un infraccion y esaki a pone cu S.V. RCA a haya un tiro di pinalti. Ronald Gomez a tuma e tiro di pinalti na 64 minuut di wega y a anota pa S.V. RCA. E wega a continua fuerte y na di 87 minuut Albert Roy “Killer” Frances a anota e di 3 gol pa Deportivo Nacional. E goalgetter di e campeonato ta Davis Oliveros. RCA a ricibi 2 trofeo cual ta di sub campeon y di miho team di campeonato regular.

Secretario General di AVB, Harm van de Seijp, tabata contento cu un publico grandi a yega stadion y apoya nan team. AVB a duna pabien na ambos team cu nan logro. Director Tecnico di Deportivo Nacional Dreyer Bracho tabata feliz cu e team a logra bay cu e titulo y cu e hungadonan a haci nan maximo esfuerso pa por a bay cu e titulo bek Noord despues di 10 aña. E victoria aki tabata e prome victoria di Dreyer Bracho cu Deportivo Nacional. Coach di S.V. RCA a expresa cu e resultado no a bay na nan fabor. E tabata contento pe hungadonan cu nan a yega leu pasobra niun hende no a conta cu nan lo yega final. S.V. RCA no a logra nan meta, pero awo nan lo cuminsa traha bek pa asina bay cu e titulo den e siguiente campeonato.

Sport Vereniging Racing Club Aruba

A funda SV Racing Club Aruba (RCA) dia 15 di februari 1934. E team a sa di crece den e ultimo 83 añanan te bira un organisacion di riba 300 futbolista. Nan ta parti den division di infantil, hubenil, hoofdklas, damas, 35+, 40+ y 50+. Roland “Ditto” Acosta ta Presidente di e organisacion, mientras cu Juan Valdez ta e coach di e team di 25 futbolista cu ta hunga den e division di Honor. Historia a conta nos cu den pasado, e team di RCA a logra titula campeon na 34 ocasion. E team di RCA ta e prome campeon di pais Aruba na aña 1986 y ta e prome team di Aruba pa bira campeon Antiano na aña 1966. E ultimo biaha cu SV RCA a bay cas cu e trofeo di campeon tabata den e campeonato di aña 2015-2016, e tempo ey contra SV Dakota. SV RCA ta conta cu sosten di su patrocinadonan Big Wheel Lottery y Powerade (Tropical Bottling Company).

Deportivo Nacional

A funda Deportivo Nacional dia 15 di Maart 1970 y desde e tempo ey a haci historia den e deporte rey di futbol. Nan ta profila den tur liga di futbol, manera ta division mini baby, baby, Lifida A, Lifida B, Mayor, Junioren y Division Honor. Tambe nan ta den e liga veterano 35, 40 y 50. Mas o menos 200 futbolista ta hunga pa Deportivo Nacional den tur division incluyendo e muchanan cu ta hunga den Lifida. Desde fin di aña 2015 a inaugura nan veld di bala nobo situa na Alto Vista. Presidente di Nacional/Coca Cola ta Silo Brete y e coach ta Dreyer Bracho. Ultimo biaha cu Nacional a bay cu e titulo di campeon tabata na aña 2006-2007, pues 10 aña pasa. Den nan trayectorio, nan a titula 5 biaha campeon y 4 biaha sub campeon. Deportivo Nacional ta conta cu sosten di Coca Cola di Tropical Bottling Company.