Prome Minister Evelyn Wever-Croes tabata na Corsou pa reuni cu Prome Ministernan di Corsou y Sint Maarten riba diferente area di cooperacion, entre otro relaciona cu e crisis di Venezuela, riba digitalisacion y e-Government y integridad. El’a reuni na Corsou tambe cu Generaal de Vin di Marina Real con por segura nos costanan mas. Cu mas cooperacion entre nos autoridadnan y Marina Real mester por logra. Durante su biahe na Corsou dialuna ultimo, el’a reuni cu Ombudsman na Corsou sr. Keursly Concincion pa conoce miho e retonan cu e oficina di Ombudsman ta enfrenta na Corsou, pa Aruba asina ta miho prepara, mirando cu pronto Aruba tambe lo introduci e instituto Ombudsman.
Den cuadro di un desaroyo sostenible na Aruba y e vision economico di diversificacion di turismo y desaroyo di ‘blue economy’, Prome Minister Evelyn Wever-Croes a reuni cu Prof Sam Cole y Dr Victoria Razak Cole. Prof Sam Cole a conseha Gobierno di Aruba riba varios tereno, rapportnan cu awe ainda tin nan valides.
Gobierno a reuni cu sra. Ivy Moll di Bond Gepensioneerden Nederlandse Antillen en Aruba. Ta e ultimo biahe di sra. Moll den funcion di miembro di directiva di e Bond. Den nomber di Gobierno di Aruba Premier Wever-Croes a gradici sra. Moll pa e esfuersonan haci den bienestar di nos pensionadonan na Hulanda.
GevMin Guillfred Besaril tabata na Aruba e siman cu a pasa pa atende varios asunto den Ministerraad, principalmente pa prepara studiantenan cu ta bayendo Hulanda pa nan estudio. A organisa un encuentro grandi na EPI pa duna informacion na studiantenan.
Siguridad den nos scolnan ta un prioridad. Prome Minister e siman aki a reuni cu Simar, CBS y Directie Onderwijs pa atende e tema aki. E trabounan pa un Maneho Nacional di Siguridad ta riba bon caminda pa asina garantisa e siguridad di alumno y docentenan.
Prome Minister Evelyn Wever-Croes y Minister di Finansas Xiomara Ruiz-Maduro a ricibi klas 6a y 6b di Scol Dununman pa splica nan kico e trabounan di Gobierno ta. Y a scucha di nan preocupacionnan. Gobierno a elabora tambe riba e vision di Gabinete Wever-Croes pa inclusion.
Conseho di Minister a ricibi e Arubiano residencia na Hulanda, Fernando Halman. Un DJ exitoso cu varios reconocemento. Gobierno a gradici Fernando pa promove Aruba den exterior.
Despues di e morto di e dos angelitonan na november 2017, Prome Minister a institui un comision pa haci un investigacion pa haya sa unda e procesonan gubernamental a faya di protehe e muchanan. Prome Minister a ricibi e reportahe final di e investigacion y recomendacionnan unda Gobierno mester traha cu urgencia pa garantisa proteccion di nos muchanan. Un investigacion profundo, y hopi tristo. Pero ta nos compromiso pa mehora e procesonan den Gobierno pa proteha nos muchanan, di berdad.
Riba tereno di enseñansa tambe tabata tin varios actividad. Graduacion di chikitinnan di kleuterschool adventista St. Andrew, unda e muchanan a demostra nan habilidad multilingual y nan conocemento biblico.
Preparacion di studiantenan cu ta bay studia na Hulanda riba 30 y 31 di juli proximo, cu participacion di Arubahuis den presencia di Gevolmachtigde Minister y cu directie Onderwijs, unda cu pa prome biaha e studiante mes por scoge su compania di seguro medico.
School kamp di Mon Plaisir school pa esnan cu ta dispidiendo di e scol y ta bayendo enseñansa secundario, unda nan a wordo prepara pa e transicion aki.
Celebracion di 50 aña di SIMAR, un pabien na e sindicato di maestronan.
Minister di Finansas, Economia y Cultura, MinFEC, a amplia riba e beneficionan cu Gabinete Wever-Croes a bin cu n’e pa brinda alivio pa Pueblo. Asina mes cu e situacion financiero di nos Pais no ta facil, toch Gabinete Wever-Croes ta haciendo un esfuerso grandi pa por trece alivio. Pa nos grandinan a percura pa duna rebaho di prima di AZV, aumento di Reparatietoeslag, aumento di pensioen y rebaho di impuesto riba entrada pa nos pensionadonan. A trece alivio di loonbelasting y inkomstenbelasting pa 32.000 persona, a reduci peso di grondbelasting pa 28.000 persona, a absorba subida di gasolin den luna di april, mei y juni y a brinda comercio alivio cu un rebaho di impuesto riba dividendo.
Diamars MinFEC a ricibi bishita di cortesia di sr. Ramon Koffijberg di Curaçao Investment and Export Development Foundation (CINEX), kende a bin extende un invitacion pa e Smart Investment Summit cu ta wordo organisa pa CINEX dianan 28 y 29 di augustus proximo na Santa Barbara Resort na Corsou. Lo tin 14 orador internacional cu ta expertonan cu lo bay elabora riba con innovacion y tecnologia ta e futuro y asina crea un strategia pa ‘smart investment’.
MinFEC a ricibi un bishita di cortesia di e Consul General di Republica di Suriname na Willemstad, sra. Henriette Agnes Daniel. Durante e encuentro a combersa riba economia y cultura y posibel cooperacion entre Suriname y Aruba. Minister Ruiz-Maduro a informa e Consul tocante e Maneho Economico di Aruba y a splike riba e 6 sectornan prometedor pa diversifica Aruba su economia. E mandatario a regala e Consul e buki ‘Wantomba y e Celebracion di Dia di San Juan cu ta parti di Aruba su tradicion’ pa asina e tin mas informacion di e fiesta tradicional di Aruba.
MinFEC a reuni cu e miembronan di Asosiacion di Panaderonan pa atende e asunto di aumento di prijs di pan. E dos panaderonan a informa cu e prijs di pan lo no bay subi pa 1 di juli awor. E Panaderonan a bini cu un proposicion pa Gobierno pa pan blanco y bruin cay bou di e control di prijs di Gobierno y tambe pa baha e prijs di pan bruin. MinFEC a encarga Departamento di Asuntonan Economico pa haci e trabounan necesario pa por yega na e regulacion necesario.
MinFEC tabata tin un entrevista cu dos reportero internacional cu ta produci e Country Report pa Newsweek USA. MinFEC a brinda informacion di, entre otro, e maneho economico y a brinda informacion riba e 6 sectornan prometedor pa diversificacion di Aruba su economia cu ta brinda oportunidad pa inversion internacional den nos Pais.
Diabierna mainta den cuadro di Celebracion di Dia di San Juan, MinFEC hunto cu Departamento di Cultura a bishita Rayo di Solo Kleuterschool na San Nicolas y a entrega na tur mucha di e scol un ehemplar di e buki “Shon Wantomba y e celebracion di Dia di San Juan” pa asina nos muchanan tambe ta bon informa riba e celebracion di e Fiesta di San Juan, Dera Gay.
MinFEC a reuni cu sr. Pascal Thierry Clivaz, director suplente di Universal Postal Union (UPU) cual ta e agencia intergubernamental specialisa di Nacionnan Uni cu ta percura pa coordina e maneho postal di e Paisnan miembro y tambe pa e sistema di post cu ta wordo uza na henter mundo. Durante e reunion sr. Thierry Clivaz a splica riba e beneficionan cu UPU ta ofrece na su miembronan, e retonan cu ta vislumbra y e oportunidadnan cu esaki ta trece cu ne. Sr. Thierry Clivaz a splica cu UPU no solamente ta percura pa e sistema postal por traha eficientemente entre e Paisnan, pero tambe ta concentra riba inclusion financiero brindando aseso financiero na esnan cu dificilmente por tin aseso na servicio financiero.
Minister di Husticia mr. Andin Bikker dialuna 17 di juni a ricibi bishita di Minister Plenipotenciario Sr. Guillfred Besaril, Sra. Jeannette Richardson Baars di Scol di Polis y Sr. Leen van der Plas. Sr. van der Plas ta director di un Kenniscentrum Security Intelligence y docente na Universidad di Amsterdam. Minister Bikker a haya un presentacion di un plan pa introduci certificacion pa companianan di siguridad y tambe duna training riba tereno di siguridad.
Diahuebs 20 di Juni, tabata un dia grandi pa Orthopedagogisch Center, momento cu Minister Bikker a inaugura 48 unit nobo di computer, y WIFI pa e centro. Minister Bikker a bisa di ta hopi contento cu Gobierno por brinda esaki den cuadro di e filosofia di Gabinete Wever-Croes pa pone e ser humano central. E computernan ta un facilidad hopi importante pa e hobennan cu ta residencia na OC, special pa nan por haci nan huiswerk of proyecto pa scol. Pa e personal di OC e computernan ta instrumentonan tecnologico moderno y importante pa por sigui haci nan trabou optimalmente. Minister Bikker a felicita OC cu nan computernan nobo y sistema di WIFI.
Siman pasa tawata tin clausura di Olimpiada Escolar 2018-2019. Un bunita Olimpiada Escolar cu tawata un exito grandi. E participacion di scolnan, alumnonan y fanaticonan tawata grandi. Gobierno a bin bek cu Olimpiada Escolar pa asina nos stimula participacion activo di muchanan den deporte. Gobierno di Aruba ta gradici tur e scolnan cu a participa, tur e alumnonan, maestronan, voluntarionan, sposnornan y sigur un danki na director di IBISA y tur e empleadonan cu a traha incansabel pa un bunita evento.
A.T.A., AHATA y Ministerio di Turismo ta enfatisa cu cuido di nos turismo ta keda na nos cada un. Un y tur mester respeta regla y leynan vigente, incluso e bishitante, y un y tur mester para responsabel pa actonan incorecto y/of indesea. Mester tene presente na tur momento si e importancia di turismo pa Aruba y trat’e cu amor, guiando y cuidando e industria principal di nos pais debidamente. Relaciona cu actividad di UTV/ATV, AHATA a manda recomendacion pa regulacion y control na autoridadnan na januari, cu lo por aporta na proteccion di nos naturalesa y na seguridad di hende. Pronto A.T.A. lo lansa un programa ‘Code of Conduct’ pa informa y pidi esnan cu ta bishita Aruba pa yuda nos cuida nos isla. Y autoridad lo actua cu man duro contra tur esnan cu viola e reglanan.
Minister di Transporte Chris Romero ta tumando accion pa cu e problematica di e vehiculonan conoci como UTV, cu di cierto forma ta mustrando di ta un peliger pa nos naturalesa, y lo bin cu un maneho nobo caminda ta specifica cu ta prohibi pa core cu e vehiculonan aki den zonanan protehi di nos naturalesa. E mandatario a reuni cu un grupo di propietario di companianan cu ta huur e vehiculonan aki pa hunto yega na miho manera pa garantisa cu nos turistanan ta consciente di e daño ocasiona na nos naturalesa ora di core iresponsablemente den nos zonanan natural protehi.
ANSA NV a entrega nan cuenta anual 2018 na Minister Chris Romero. Di e manera aki gerencia di Air Navigation Services Aruba (ANSA) NV ta cumpli cu e statutonan di e compania y asina mustra e resultado financiero positivo cu e compania estatal aki ta hayando.
Aruba a ricibi bishita di e Vice Presidente di Universal Postal Union, sr. Pascal Thierry. Minister Romero a ricibi sr. Thierry y a intercambia di idea y opinion pa asina mantene e continuidad di servicio postal na Aruba na un forma optimal y innovativo, mirando e desaroyo tecnologico mundial.
