Despues di e morto di e dos angelitonan na november 2017, Prome Minister Evelyn Wever-Croes a institui un comision pa haci un investigacion pa haya sa unda nos a faya den nos procesonan gubernamental di protehe e muchanan. Diabierna atardi di siman pasa, Prome Minister a ricibi di sra. Magaly Maduro y sra. Hariette Martis e reportahe final di e investigacion y recomendacionnan unda nos mester traha cu urgencia pa garantisa proteccion di nos muchanan.
E comision a papia cu tur departamento y instancianan encarga cu proteccion di mucha y cu tabata tin un papel den bida di e dos angelitonan. Esaki tawata un investigacion hopi profundo, y hopi tristo. Pero ta compromise di Gabinete Wever-Croes pa mehora e procesonan den Gobierno pa di berdad proteha nos muchanan.
Ta importante pa brinda nos muchanan educacion y un hogar, proteccion y elimina pobresa. Tambe ta importante pa tene esnan culpabel responsabel pa nan actonan contra nos muchanan y actua cu man firme contra e malechornan aki.
Pa Gabinete Wever-Croes, ta hopi mas importante pa pone e ser humano central cua ta e enfoke principal. Den e meta aki di Gobierno, e ‘Sustainable Development Goals’(SDG’s), e metanan cu Nacionnan Uni a establece 3 aña pasa pa caba cu pobresa den mundo y cu ta duna oportunidadnan igual na tur hende, ta hustamente e curason di maneho di Gabinete Wever-Croes: pone e ser humano central y crea oportunidad pa tur hende. Pa e motibo aki tambe, e parti social tin atencion completo di Gabinete Wever-Croes. Pa hopi aña, esaki no a haya su debido atencion y awe nos ta cosechando resultadonan drastico, lamentabel y doloroso. Pa Gabinete Wever-Croes proteccion di nos muchanan ta central
“Nos por y nos mester haci hopi mas pa protege nos muchanan den henter mundo y especialmente na Aruba, garantisa bienestar di nos muchanan, poniendo e ser humano central,” tabata e palabranan di Prome Minister Evelyn Wever-Croes.