Parlamentario Alan Howell ta sumamente contento y satisfecho cu e prome edicion di Island Fest cu a tuma lugar diaranson pasa na San Nicolas.
Despues di e bashi cu a keda atras cu Carubbian Festival, Alan Howell a sa di presenta e deseo di no solamente e pueblo di San Nicolas y pariba di brug en general, sino tambe di henter pueblo di Aruba y bishitantenan, pa bin cu un actividad similar na San Nicolas.
E ta contento cu Minister Dangui Oduber a sa di responde na e yamado y pedido aki y asina a presenta e Island Fest. Hende di tur parti di Aruba y bishitantenan a gosa, come y interactua socialmente cu otro. “Un super bon vibe a reina henter anochi. Practicamente tur foodstand a “sold out”. Un pabien na e board di Island Fest, ATA, Vendornan, musiconan, artistanan, publico presente y muy especial Minister Dangui Oduber pa scucha e peticion di pueblo y especialmente di esnan di pariba. Together We Can Make It Better”, Alan Howell a expresa.