Diasabra 18 di mei, a tuma luga na Corsou e final di Arte di Palabra ABC. Manera costumber, durante e evento aki a rindi homenahe na baluartenan kendenan ta duna un aporte balioso na idioma y cultura di Aruba, Corsou y Boneiro. Total, 5 baluarte a ricibi e Tapushi Literario. Pa Aruba, Señora Miriam Koolman-Rosel, kende cariñosamente ta wordo yama Mimi, a ricibi e reconocimento special aki.
Mimi, di Radio Bo Guia FM, desde inicio a establece e meta pa e emisora promove nos idioma Papiamento y nos cultura. Loke ta di nos, prome! Bo Guia FM semper ta duna honor na nos idioma y nos cultura den e canticanan cu ta toca y e programanan di tur dia.
Bou wapamento, esnan cu a wordo reconoci a subi stage na momento cu e cantica ‘Ban Wapa cu e yiu di Tera’ a cuminsa toca na unda e publico a ricibi nan cu un fuerte aplauso. Señora Mimi a subi stage cu bandera di Aruba den su man mustrando un biaha mas su amor y orguyo pa nos patria.
Prome Minister Evelyn Wever-Croes y Gobierno di Aruba ta felicita Señora Miriam Koolman-Rosel cu e bunita reconocimento aki y alabes ta gradici Mimi pa semper promove, proteha y conserva nos idioma y nos cultura.
