ORANJESTAD – E comision Vision Pedagogico ta felicita tur famia na Aruba awe 15 di mei 2019 cual ta Dia Internacional di Famia. E comision aki tin como meta pa traha ariba e parti preventivo y pa medio di esaki kier conscientisa e comunidad di Aruba, e rol importante cu nos tur tin pa loke ta trata lantamento di mucha. Alabes e comision kier brinda sosten y ayudo na tur mayor y educador na Aruba, pa hunto logra un Aruba cu famianan sano. Un famia sano ta crea un comunidad sano!
E vision cu e comision aki tin pa Aruba ta lo siguiente:
Cu na Aruba nos tur hunto ta percura pa e mucha(nan) por crece den un ambiente pedagogico optimal, den un famia afectivo y safe y den un bario cu ta tene cuenta cu e mucha.
Pa medio di educacion positivo (sostene, stimula y guia) e mayor ta guia su yiu mas miho posibel den su desaroyo pa bira un adulto.
Hopi importante ta cu e mucha ta sinti siguridad emocional, ta desaroya su habilidadnan social y personal, ta haya chens pa siña norma y balor y ta hunga un rol activo den un comunidad multicultural.
E forma cu e comision kier logra e visión aki ta dor di consientisa cada famia den nos comunidad e 6 puntonan basico aki:
- Lanta bo yiu den un ambiente safe y cu amor.
- Brinda bo yiu un apoyo positivo, guia y pasa tempo di calidad hunto cu ne.
- Sea realistico di locual bo ta spera di bo yiu, si esaki ta segun su edad.
- Brinda bo yiu un disciplina positivo dor di sostene, stimul’e y gui’e.
- Cuida bo mes como mayor di stress.
- Si tin mester busca sosten y ayudo cerca instancianan.
E comision ta consisti di 5 diferente organisacion e.o.: Fundacion pa Nos Muchanan, Stichting Wit Gele Kruis, Fundacion RespetaMi, Tienda di Educacion y Departamento di Asunto Social cu diariamente ta traha cu famianan y ta brinda e sosten y ayudo pa logra esaki. Banda di e comision aki tin un plataforma mas grandi di instancianan cu ta yuda sostene e vision y cu lo yuda comparti e puntonan aki den cada skina na Aruba.
Pronto lo bay tin den tur bario anochinan di informacion pa mayornan y educadornan cu ta desea pa sa mas ariba e topico aki. Keda pendiente!
Pa mas pregunta y/of informacion por tuma contacto cu Tienda di Educacion na telefon gratis 161 of cu Fundacion pa Nos Muchanan na telefon 588-0856.