Oranjestad – Aruba Press Award ta un reconocemento organisa pa medio di Aruba Tourism Authority cu mercadeo den e continente Latino America cual recien a tuma luga. Prensa di Latino America a wordo premia pa genera contenido enfocando riba Aruba for di nan propio punto di bista. Ganadornan a wordo elegi por medio di huradonan local y internacional den categorianan di Television, Revista, Radio y Medianan Digital.
Bao iniciativa di Aruba Tourism Authority, a pidi periodistanan di region Latino America pa inscribi nan mes pa competi pa diferente premio riba diferente area. Un total di 80 persona a inscribi y siman pasa nan a wordo reconoci. Un di nan premionan entre otro tabata pa bin Aruba pa ricibi nan reconocemento na nos isla. Pa algun di nan esaki tabata e prome bishita riba nos isla pa disfruta y experiencia Aruba.
Cada periodista a trece -na un manera diferente den nan perspectiva- con nan ta wak Aruba. Nan enfoke tabata diferente, riba nos flora y fauna, cultura y arte.
“Nos ta consciente cu e trabao di periodismo di turismo no ta un tarea facil,” CEO di Aruba Tourism Authority Ronella Tjin Asjoe-Croes a expresa. “E segmento aki (Prensa Turistico) apesar di ta un parti chikito den e campo di periodismo, e conexion den relacion publico y fuentenan nobo di informacion, ta dun’e un aspecto di accion reduci, cual pa por amplia su mes, lo mester por enfoka no solamente riba cantidad pero sigur riba calidad di publicacionnan.” Den e sentido aki, segun CEO di A.T.A. ta subraya, pa permanece vigente den e mercado, e medionan mester re-inventa nan mes y keda al caso di e tendencianan na e velocidad cu e mercado ta exigi.
“Na mes momento, nos destinacion mester ta den e capacidad pa re-inventa su mes y pa ofrece tur herment na e medionan pa nan por opera debidamente.” Tjin Asjoe-Croes a elabora.
Cuater ganador di APA 2019
E periodistanan Latino Americano premia durante e anochi honorario aki tabata:
- Patricia Alejandra Morales Toro di Revista Mujer La Tercera (Chile) pa su publicacion titula ‘Aruba, Destino Wellness.’
- Andrea Paola Terán Becerra di Tendencia (cual ta circula na Venezuela, Miami, Orlando, Dominica, Aruba y Panama) pa su publicacion titula ‘Padu del Caribe, Cinco Decadas de Una Leyenda Musical.’
- John Edison Pineda Albarracin y David de los Rios di Trendiando TV pa nan programa titula ‘Arte Urbano Colombiano en Aruba.’
- Analia Pinto di Radio Conexión Abierta (Argentina) pa su programa riba e tema ‘La Vida Moderna de Analia Viaje 158 Destino Aruba #Paraiso.’
Calidad investigativo y originalidad
Pa Aruba Tourism Authority, e independencia y obhetividad di e periodista di turismo na momento di realisa su reportahe ta fundamental. Su experiencia personal di e destinacion ta esencial pa por refleha su mes den e trabao y asina destaca atributonan y areanan di oportunidad na un manera cu e lesado of audiencia por conoce e luganan aki for di wowonan di esun cu ta publica, y no for di e mensahenan pre-diseña. Cu esey den mente, na Aruba, A.T.A. ta busca pa desaroya contenido editorial fresco y moderno cual ta permiti conta storianan unico tocante nos isla cu rikesa den material grafico. Como tambe testimonionan di nos habitantenan cu ta refleha e esencia di nos isla. Den un
manera creativo por mira con calidad investigativo y originalidad ta trece tremendo beneficio.
“Pa e motibo aki, nos como Aruba Tourism Authority ta realisando accionnan conhunto, manera e Aruba Press Award, cu ta sumamente importante pasobra e ta habri un bentana cu posibilidad pa bishitantenan por conoce nos isla por medio di nan pen, bos of lens,” Tjin Asjoe-Croes a conclui. “Nos miembronan di prensa local presente tambe a wordo reconoci por medio di nan importancia igual na nos desaroyo turistico pasobra na final di dia, nos comunidad local ta sostene nos desaroyo turistico y mester mantene su mes informa tocante e industria, y consciente di tur e obhetivonan estableci.”
Por ultimo, CEO di A.T.A. Tjin Asjoe-Croes a expresa su gratitud profundo na prensa local pa nan trabao y contribucion continuo na esaki.