ORANJETAD – Riba Dia di Rey na ocasion di entrega di premio Copa Hubenil Gobernador Felipe B. Tromp, Gobernador a haci entrega di premio di estimulo na hobennan cu a destaca den cultura, social y deporte. E hobennan Zayna Maduro y Rebecca Jansen a ricibi premio pa nan prestacion den deporte na nos Pais.
Zayna Maduro ta un hoben di 13 aña cu ta practica e deporte di gymnasio y ta miembro di Club Gymnastico Arubano AVANSE. For di chikito Zayna ta practica e deporte di gymnasio y ta haya puntuacion halto pa e diferente technica di e deporte aki. Na 2018 Zayna a participa den dos competencia internacional na Colombia y na Republica Dominicana. Durante e competencia ‘Sudamericano de Gimnasia Artistica Niveles USAG,’ Zayna a gana diferente medaya di plata y brons. Na Republica Dominicana durante e ‘Copa Internacional Interclubs’ Zayna a gana un medaya di oro y tres di brons.
E otro premio di estimulo pa aña 2019 a bay pa Rebecca Jansen, un hoben di 14 aña di Ciclo Basico 2 na Colegio Arubano. Na edad di 9 aña Rebecca a cuminsa practica e deporte di Triathlon cu ta conbina ciclismo, coremento y landamento. Rebecca ta practica mountainbike tambe. Na 2018 Rebecca a ricibi e premio di ‘Kids Female Athlete’ di Aruba Triathlon Association. Su disciplina pa cu training y competencia ta haci cu Rebecca ta gana sea prome of segundo premio den tur competencia di su categoria.
Algun logro di Rebecca ta, campeon mucha muhe bao 15 aña di ‘Aruba National Championship 1 km,’ prome luga di ‘National Aquathlon’ pa mucha muhe, prome luga den ‘Student Open Relay 6 km’ durante e ‘International Half Marathon’ na maart ultimo.
Rebecca kier stimula mas mucha muhe pa practica un of mas deporte pa condicion y pa socialisa cu otro nan.
Masha pabien na Zayna y Rebecca. Danki pa boso aporte activo y positivo den deporte na nos Pais