Na anja 2011 un comishon lanta door di entre otro SKOA, KPA, Ministerio Publico, SMC, Fundashon Telefoon pa hubentud conjuntamente cu departamento di ensenjanza a firma un protocol pa asina logra e meta di introduci e metodo “traha na un Scol Safe” y su manual.
Na anja 2016 e manual “Guia un pa scol Safe” a wordo lansa. Riba e siguiente website por hanja full e splicashon con esaki a wordo crea: http://www.ea.aw/pages/zorgstructuur/veilige-school/
Riba e siguiente website di enseñanza Aruba tin e manual pa loke ta trata nos scolnan primario: http://www.ea.aw/pages/wp-content/uploads/pdf/doc-pub/v/2016_po_gids_werkenaaneenveiligeschool-1.pdf
Riba e siguiente website di enseñanza Aruba tin e manual pa loke ta trata nos scolnan secundario: http://www.ea.aw/pages/wp-content/uploads/pdf/doc-pub/v/2012_vo_gids_werkenaaneenveiligeschool.pdf
Apesar di esaki, te awe na 2019 tin hopi incidente ta tuma lugar den nos scolnan rond di Aruba. No ta unicamente loke nos ta lesa den prensa mane un bringamento na X scol, pero menasanan cu ta sosode casi diariamente rond di Aruba contra nos maestronan. Sin lubida e abuso verbal cu hopi di nos docentenan mester wanta di mayornan o hasta di alumno. Tin hasta momento cu esaki por bai over na agresividad contra docente. Tin varios casonan registra cu nunka no a wak luz di dia. Pa es motibo aki hopi di nos cuerpo di docente aki na Aruba ta sinti nan mes defrauda den nos Sistema.
Como docente nos ta pidi igualdad den proteccion. No unicamente proteccion di nos alumnonan pero tambe proteccion di nos cuerpo di docente cu ta duna alma y cuerpo na educashon di nos muchanan.
Ensenanza di Aruba a conoce hopi reto y ainda ta conociendo hopi pa asina nos por sigui brinda un educashon na nos futuro di manjan. E cuerpo di docente ta exigi respet, paso pa ta un docente, e no ta unicamente un vocashon, pero tambe ta exigi un preparashon academico prome cu un persona por para dilanti klas. E ta un preparashon academico di minimo riba HBO niveau.
E publicashon aki ta bin despues di diferente incidente cu a tuma lugar e anja aki den varios di nos scolnan rond di Aruba culminando e siman aki na un scol primario den e area di madiki unda un docente a wordo agredi ferosamente door di un mayor sin cu e docente aki por a defende su curpa door di su aggressor. Docentenan a cuminsa cansa y ta pidi auxilio di no unicamente nos dirigentenan pero tambe di nos schoolbesturen.
Pesey mes cuerpo di docente ta pidi oido di nos minister actual di ensenjanza Dr. Rudy Lampe y tambe comishon di ensenjanza den parlamento, muy en especial e voorzitter di e comishon sr. Ricardo Croes pa cu e problematica aki.