Parlamentario Endy Croes a splica cu pa varios aña desde 2010 en adelante AVP a usa un tal Donkey Melvin pa purba di crea un scenario cu nunca tabata existi den Lotto pa deporte pa desacredita tur e miembronan di Bestuur anterior y specialmente Endy Croes awe den un funcion como Parlamentario. Na mas o menos 11 ocasion Donkey Melvin a bay Canal 90 en bibo pa papia oranan largo riba Lotto pretendiendo cu a laga Lotto bancarota y cu un cantidad di storianan falso. Manera nos a bisa semper tempo ta bo mihor amigo y pa con liher un mentira por wordo lansa semper e berdad lo alcance na caminda. E activistanan di AVP nombra den bestuur nunca por a entrega cifranan di un accountant.
Pruebanan palpabel
Porfin dia 7 di februari 2014 contra tur regla di Good Governance y Statuut, Lotto a logra produci un Financial Statements di aña 2010, esta e maneho di e promer aña cu Bestuur di AVP ta completamente responsabel. Donkey Melvin tabata un di esnan cu constantemente tabata bisa cu a encontra un Lotto bancarota. Parlamentario Endy Croes den diferente conferencia di prensa a refuta cu a laga casi 6 Miyon cash na banco mas 11.5 MIYON di Land Aruba pa e proyectonan andando. Semper a keda para ariba cu AVP a ricibi alrededor di 17 MIYON florin pa por a sigui traha. Porfin a cay den nos man e pruebanan palpable. A sconde nan pa 9 aña. Riba pagina 9 di e Financial Statements di aña 2010 cual rapport Ernst & Young mes a traha y a entrega finalmente 7 di februari 2014 ta para claramente cu na december 2009 a keda “cash at the bank and in hand” un suma di 5.752.139 Miyon florin mientras cu riba mesun pagina ta splica cu na december 2010 (AVP) tabata tin 3.238.291 Miyon na Banco. Mester splica tambe cu na juli 2010 ta hustamente AVP a ricibi e suma di 11.5 MIYON door di Land Aruba pa e proyectonan mientras den 2010 AVP a presta tambe 7.5 MIYON na AIB pa operacion algo cu nunca a pasa bou di MEP. Nunca a presta placa pa operacion.
Berdad a alcansa mentira
Ta reta Donkey Melvin pa lesa e Financial Statements 2010 cu hopi atencion cual por cierto tin hopi informacion. Ta reta Donkey Melvin pa bay conferencia di prensa awor pa duna splicacion. Claramente tempo ta e mihor amigo cual a desmantela tur e storianan falso di AVP. Tristo pa mira con Bestuur di AVP a crea un smokescreen pa asina “horta” kisas na un manera legal mas di 3 MIYON di fondonan di Lotto. Amigonan di AVP tur ta comerciante den Bestuur y tabata paga nan mes miles y miles di florin pa nan mes duna tur tipo di servicio y conseho na Lotto. Mientras deportistanan tabata sclama den solo y ta wordo cori momento nan hiba un peticion. Un man yen di activistanan di AVP tabata goza di e fondonan. Con CBN Canada por permiti semehante maneho? Parlamentario Endy Croes ta spera cu Donkey Melvin por busca e Financial Statement (of manda pidi nos) y alaves ta conseh’e pa e cuminsa na busca un “tolk” pa por traducie p’e di Ingles pa Papiamento y un hende pa splik’e e contenido. Pa con liher un mentira ta e berdad semper lo alcans’e. Duna tempo tempo. Politico mester ta sincero cu su pueblo. Nunca pero nunca mas pueblo mester duna AVP un voto di confiansa.