Durante ultimo dos aña por a scucha continuamente cu e minister anterior di infrastructura, Benny Sievinger, no tabatin maneho pa loke ta trata dunamento di tereno, solamente amigonan ta haya, cu a firma riba tur papel y cantidad di otro critica mas.
Den parlamento un biaha mas sr Sievinger por a scucha minister Otmar Oduber ripiti e cosnan aki durante reunion publico pa trata presupuesto di DOW, y cu su persona no ta wak color, esta nada.
“Ora cu AVP a drenta den gobierno, nos a haya un maneho na DIP y bo por ta di acuerdo cu e maneho of no, pero tabatin un maneho y nos a haya un maneho di sra Marisol Lopez Tromp. Nos a revisa e maneho aki y nos a haci algun cambio, cu no tabata mucho.
Un di e cambionan cu nos a haci, loke nos ta yama un ‘pre-reservacion’ cu ta ‘pre-reservering’ cu Benny Nisbet a introduci pre-reservering, ni Marisol Lopez Tromp y ni tampoco Otmar Oduber.
Awe e ta usa e pre-reservering aki cu supuestamente e no a haya como maneho, pero kico ta e cambionan cu el a haci y kico ta pre-reservering? Ora un persona haya un tereno, e ta haya un opcion cu e mester cumpli cu diferente rekisitonan pa por haya e tereno aki pa por construi un cas.
Un di e rekisitonan aki y segun experencia cu nos tabatin, cu e persona mester presenta un carta financiero, e persona cu a haci e reservacion mester mustra cu banco, FCCA of e persona mes tin suficiente placa cu cual e por traha un cas.
Nos a ripara cu hopi hende tabata confronta problema riba e punto aki y e persona ta haya 6 luna di opcion, nan no a keda cla cu banco, a duna nan dos pa tres prolongacion y mi ta bisa Minister Otmar Oduber, cu Benny Sevinger tabata duna tur hende prolongacion.
Pesey por a mira cantidad di hende bin mi oficina tur dia ya cu tur hende tabata haya prolongacion y no manera ta e caso awor aki, caminda minister Oduber ta bisa e hendenan cu e ta transparente, e peticionnan ta bay DIP y DIP no ta duna ningun prolongacion.
Pero esunnan cu ta cerca di dje y su partido, si ta haya prolongacion anto riba dje bo kier tilda Benny Sevinger cu e tabata firma riba tur cos pero tur hende tabata haya prolongacion, sin distincion, incluso hendenan di MEP, AVP, POR, tur tabata haya prolongacion.
Awor minister Otmar Oduber a trece cambio den e proceso aki caminda nos tabata duna un tereno por ehempel di 500 meter cuadra y ta informa e persona cu a pidi esaki, cu e mester por demostra di por traha un cas di minimo di 20% di e balor di e grandura di e tereno.
Esaki ta nifica c’un persona cu haya un pida tereno di 500 meter cuadra durante periodo di Benny Sevinger, mester traha un cas di minimo 100 meter cuadra y nos tabata aplica un prijs di mil florin pa meter cuadra.
Esey ta encera cu e persona tin cu bin c’un carta di banco of FCCA of di dje mes caminda e por mustra cu e tin 100 mil florin pa traha su cas, y e ta haya e tereno oficialmente.
Awor minister Otmar Oduber, minister cu ta bay yuda pueblo, a aumenta esaki na 30% y esey ta nifica cu e persona cu kier a traha su cas di 100 meter cuadra, ya no por traha un cas di 100 meter cuadra pero tin cu traha un di 150 meter cuadra anto e balor pa meter cuadra a bira 1600 florin, pues e persona aki tin cu demostra cu e ta haya un carta di banco pa e suma di 240 mil florin, cu ta un diferencia di 140 mil florin, anto ta yuda e ta yuda pueblo.
Mi a bisa den e reunion di Parlamento y mi ta ripiti esaki cu Benny Sevinger a laga mas di 900 tereno midi, habri pa loke nos ta yama caminda di santo, cu tur contratistanan cu a haya pa habri caminda pa medio di DOW, via di DIP, via Kadaster cu a midi e terenonan aki y hasta nos a laga nomber di hendenan pa e terenonan aki.
Minister Otmar Oduber a bira bisa e hendenan aki cu e no ta reconoce nan peticion ya cu aparentemente nan no ta Rubiano, nan no tin derecho y a dicidi di duna otro hendenan e terenonan aki.
Hecho ta cu nos a laga mas di mil tereno pa e maneho y mi a bise den Parlamento cu e unico mil tereno cu e ta bay duna, e ta mil terenonan ey, esaki sin conta Burunbundo, cu tambe ta conta cu otro mil, caminda probablemente e por duna algun pero mas cu esey minister Oduber no ta bay duna.
Awor minister Oduber ta yama un grupo di hende aden, 300 persona, haci un tipo di fiesta na hotel, ta pidi nan bin para band di dje, pasobra su persona ta bay duna nan tereno, smile y saca potret cu e minister y corda ora di vota, pa vota pa su persona tambe.
Cos cu nunca mi persona como minister a haci, ya cu DIP tabata duna e hendenan nan tereno y mi persona no tabata sa mes kende a haya tereno of no.
Sinembargo hilaridad di henter e asunto aki ta cu ora mi a puntra su persona durante tratamento di presupuesto aña pasa cuanto tereno el a duna, el a contesta lo siguiente y el a manda e siguiente contesta: “Minister por informa parlamento cuanto tereno pa cas a ser duna den optie den aña 2018?”
Contesta di minister na Parlamento ta lo siguiente: “1050 tereno a ser duna den optie na 2018, y rib e siguiente pregunta: ‘minister por splica parlamento cuanto a pasa acto notarial?’
Aki minister Otmar Oduber a informa parlamento cu 170 a logra pasa acto notarial y esey kiermen cu e minister a kita 1000 tereno bek di tur e hendenan aki cu el a saca potret cu nan, haci propaganda politico cu nan pero no a yuda nan cu ningun tereno.
El a duna 1050 y el a kita 1000 tereno bek y tur esaki pa motibo cu minister a exigi di e hendenan akj e 30% cu e hendenan no por yega na dje ya cu na momento cu nan tin cu pasa e acta, nan tin cu bin c’un acta di hipoteca cu tampoco ta facil pa haya for di e banconan.
Pues awor kico e minister aki ta haci, e mesun 1000 tereno aki cu e no a duna na esunnan cu a pidi tereno caba, e ta bolbe invita otro grupo bin dilanti, saca potret cu nan, haci propaganda politico cu grandi y chikito pero ora cu e kita e tereno bek di e hendenan aki, minister Otmar Oduber no ta yama e hendenan aki bek y saca potret cu nan.
Pues ta un farse di marca mayor ta tumando luga y e minister aki ta un hipocrita como minister ya cu e no ta yudando e hendenan aki yega na nan cas pero e grupito rond di e minister si, eseynan si ta hayando cas.
E maneho cu mi persona a laga atras ci 20% di e balor di cas pa traha esaki, di 1000 florin pa meter cuadra, e minister aki mester bay bek eynan, e mester y cu di otro forma e lo sigui hunga e comedia aki y na final di dia ni 400 hende lo haya tereno pa traha nan cas.
Aki tur hende por mira cu intencion di e minister aki no ta pa yuda hende yega na nan cas, su intencion ta di saca potret cu su persona entregando e tereno pero si e hendenan aki perde e tereno ta nan cuenta ya cu el a tuma un medida cu ta imposibilita hopi di cumpli cu e condicionnan aki.
E hendenan aki no tin un chens real pero si e minister ta pidi pa vota pa su persona y esey ta muestra di un mentalidad hipocrita,” Parlamentario Benny Sevinger a mustra.