“Salem, Salem” ta e palabranan di Oye ora e keda deteni, prome cu e mester subi transportwagen.
Awakatistraat – Dialuna den oranan di anochi propietario di Town Dragon bar & restaurant ta pidi asistencia di polis, pa un homber fastioso.
Na yegada polisnan ta top un biaha mas cu nan amigo OYE, manera e ta wordo yama den e bario di Dakota. Oye ta un persona cu ta biba den Dadelstraat, cu constantemente polis tin cu bay atende cune, pero esaki ta sosode solamente ora cu Oye ta bou influencia, paso e por bira sumamente fastioso y cansa tur hende cu pasa den su becindario. Ora Oye no ta bou influencia, e ta masha trankilo.
Pa e motibo aki tambe e doño di Town Dragon a pidi asistencia di polis. E agentenan na e sitio a papia tur na bon cu Oye pa e bandona e sitio, pero Oye no kier a scucha di e agentenan y no a keda nan nada otro cu pa un biaha mas detene Oye.
Mientras e agentenan tawata atende cune, e tawata bisa nan cu e no a haci nada y cu e mes ta paga su bebidanan.
Polis a opta pa detene, paso si nan lage, mas laat nan lo mester bolbe Dakota pa atende cune, paso esaki no ta prome biaha cu nan ta bay un asistencia pa Oye. Esaki ta djes un mas riba nan lista, tur hende den bario di Dakota conoce Oye y sa con Oye ta bira ora e ta bou influencia, no ta importe nada y ni tampoco e orario, e ta subi tras di stuur di su pickup y full trott e ta core rond den Dakota ta pita.
Semper ora nan detene Oye y prome cu nan hinke den transportwagen e ta cuminsa bisa “Salem, Salem”, y mane e ta custuma caba, e ta subi trankilo den transportwagen pa bay direccion di Warda di Polis.
