Y un biaha mas pueblo y economia ta sufri!
Publicacion di dos rapport recientemente, ta confirma cu pais Aruba ta den un deterioro economico. Caida di nos economia y perdida grandi di poder di compra na man di un inflacion feroz causa dor di pakete di medida di Gabinete Evelyne Wever Croes ta worde confirma den
ultimo reprtahe mensual di Banco Central Aruba (CBA) y rapport di Centraal Bureau Staistieken (CBS) e ider di AVP, Mike Eman a revela e siman aki.
Sr Eman a mustra cu partido AVP a bin ta bisa algun tempo caba, caminda a mustra riba e decision di gobierno pa redobla BBO y e tempo ey caba, a base di experiencianan di pasado, AVP a mustra cu na momento cu gobierno aumenta BBO, e tempo ey 3%, cu e lo final, resulta den 10% riba e poder di compra di pueblo.
“Nos a haya e resultado ey despues di un aña y manera cu gobierno a cuminsa wak den e direccion ey, nos a mustra gobernantenan cu esaki ta locual ta sosodiendo.
Gobernantenan a nenga, caminda entre otro minister di finansa a declara cu esaki lo haci solamente un tiki dolor so pero realidad ta cu e impacto lo no tabata un tiki, e impacto ta hopi y di biaha despues di algun luna, nos a cuminsa haya confirmacion di kico ta pasando cu economia di pais Aruba,” sr Mike Eman a declara.
E lider di AVP a cita for di un rapport di Banco Central riba e ‘economic outlook’ cu a sali algun luna despues cu gobierno a tuma e medida aki y cu ta bisa: ‘the introduction of the crisis levi in july 2018, will likely effect the real GDP through reduced comsumption in both 2018 and 2019.’
AVP a para den Cas di Partido dilanti di medionan di comunicacion y anuncia cu ta bay tin perdida di poder di compra, ta bay tin perdida di benta, economia finalmente ta bay wordo afecta y si economia wordo afecta asina grave cu e ta bay bou di cero, Aruba lo haya un recesion.
“Mi no ta kere cu ningun hende a lubida Mike Eman para akinan, bisando cu manera e cos aki ta canando, manera e poder di compra a wordo afecta, caminda mi a cita for di e Business Survey Rapport cu a bisa cu benta a cay, cu inversionnan a cay, confiansa a cay y cu tur esaki ta bay conduci na un caida den nos economia, perdida di poder di compra y empobrecimiento di nos hendenan. Y kico a pasa, na luga di concentra riba e desaroyo negativo aki, parlamentarionan cu ta sostene gobierno, a dicidi di bay mira ta kende a traha e grafieknan, si nan ta di Banco Central of no, pero realidad di e situacion tabata cu e grafieknan tabata ilustra exactamente locual e rapport di Banco Central tabata bisa, niun porcentahe menos, niun porcentahe mas.
Finalmente e analisis cu mester a wordo haci dor di gobernantenan y esunnan cu ta sostene e gobierno actual, ta con pa para e direccion robes cu a scoge pa hiba nos economia na e momento ey, pero nan a scoge pa sigui den e direccion ey.
Kico nos ta mira awe, Banco Central cu a rapporta tambe den su Economic Outlook na oktober 2018 mustrando: “increase in the turnover tax BBO and the healthtax BAZV from 3.5% to a combined 6% is forecasted to reduce the purchasing power of consumers by a considerable amount in both 2018 and 2019”.
Nos a bisa gobernantenan cu e direccion cu nan escogiendo aki ta uno incorecto ya cu AVP a laga pa nan un pais cu tabata creciendo na 2.3% di su GDP, nos a laga un pais caminda e deficit tabata bahando, sistematicamente nos tabata corta gasto y nos tabata percura pa sin fractura economia di Aruba, sin fractura e poder di compra di nos hendenan, nos a percura pa sistematicamente economia sigui crece mientras cu nos tabata bahando gastonan di gobierno, asina cumpliendo tambe cu tur norma di CFT.
Esaki no por wordo nenga awe ya cu ta conoci caminda e norma di 3.7% pa 2015, nos a logre, e norma di 2.0% na 2016 caminda CFT a bisa cu nos gobierno a logra esaki y nos tabata trahando ainda riba e norma di 0.5% pa 2017 cu finalmente nos no tabata den gobernacion pa cera esey y ta eynan ta caminda e tragedia economico di nos pais a cuminsa.
For momento cu e gobierno actual a scoge pa e modelo Nilo Swaen, modelo Nel Oduber, modelo di tur esunnan rond di nan, modelonan cu a fracasa, modelonan cu a haci hopi dolor den nos comunidad y no a por nada na september di 2009, nos a para akinan c’un partido cu 12 asiento for di 8 asiento, pasobra pueblo tabata sufriendo, e pueblo tabata sinti inhusticia, pueblo tabata sinti cu no ta su interes pero ta interes di amigo- y famianan, tabata rigi e prioridadnan di e pais aki y awe nos ta haya mesun realidad aki.
Na luga di bin c’un plan, bin c’un vision pa stimula nos economia, pa trabounan por wordo crea, pa poder di compra di nos hendenan por wordo sosteni manera cu nos a haci cu reparatietoeslag, cu schoolkindertoeslag, cu indexering, por medio di bijstaand, cu aumento di pensioen di nos grandinan, a scoge pa e modelo di medida atrobe. Kico nos ta mira, e mesun rumbo, e mesun receta di bin cu medida pa ranca placa di pueblo supuestamente pa baha e deficit pero CFT ta mustra cu e mesun gobierno aki a aumenta su gastonan cu mas di 100 miyon florin y awe pueblo ta biba e consecuencia di repiticion di e modelo di medida” Mike Eman lider diAVP a declara.