Durante e siman aki tur instancia envolvi den e ehecucion di e Plan di Crisis Social a reuni cu Minister di Asuntonan Social y Labor Sr. Glenbert Croes, pa asina duna un raportahe di con e ehecucion di e plan ta bayendo.
E ley di e fondo presupuestario “Sociaal Crisisplan” a keda aproba den Parlamento di Aruba na luna di augustus 2018. E ley ta prescribi cu cada kwartaal, tur departamento di Gobierno, Fundacionnan y instancianan envolvi den e ehecucion di e Plan di Crisis Social mester duna un raportahe.
E raportahe aki tin como meta pa duna un bista di tur e trabounan y actividadnan cu a bin ta tumando luga den e ultimo lunanan. Ta importante pa monitoria con e ehecucion di e Plan di Crisis Social ta desaroyando. Tambe ta inclui un raportahe financiero pa responsabilisa e gastonan di tur actividad- y proyectonan cu ta forma parti di e plan su totalidad.
Ademas, e reunionnan aki ta brinda oportunidad pa ahusta loke y unda ta necesario.
Ademas di Minister Glenbert Croes, a conta cu presencia di Miembro di Parlamento di Aruba, Sra. SueAnn Ras, kende ta presidi e Comision di Supervision institui pa Parlamento. Tambe diferente representante di Departamento di Asunto Social, Departamento di Finansas, representante di CEDE Aruba y representante di UNICEF Hulanda cu a regresa Aruba pa esaki, tur a forma parti di e raportahe aki.
Minister Glenbert Croes ta gradici tur departamento y instancia pa nan contribucion na e ehecucion di e plan. “E reunionnan aki ta demostra e gran compromiso cu tur e socionan di e Plan di Crisis Social tin y mi ta satisfecho cu e raportahenan cu a ser presenta” e mandatario a expresa.