Boca Catalina: Diasabra den oranan di atardi na momento cu algun turista tabata gosando na e beach banda di Boca Catalina, nan a bira victima di ladronicia. Mesora nan ta pidi pa presencia di polis.
Na yegada di polis nan ta bin compronde cu e turistanan tabata gosando na beach y no lo tabata na altura cu Aruba no ta sigur manera antes mas. Nan a bisa polis cu e ladronnan no a bay solamente cu nan pertenencianan, pero tambe cu e v car 133 cu nan tabata huur. E ladronnan a bay cu un tas den e tas tabata tin un Iphone y placa cash.
Na prome instante e turistanan no tabata corda e number di e auto y ni e marca of model di auto. Polis a dicidi di bay cu nan hotel pa asina haya mas informacion di e auto. Riba caminda pa bay hotel, na Malmok, no mucho leu di unda e auto a wordo horta nan a bin topa cu e auto para banda di lama, bou di un mata.
E turistanan mesora a reconoce e auto, nan a bay mira den e auto y a topa cu e tas, pero e cent y e iphone cu tabata tin den e tas a desaparece.
Polis a avisa e car rental y a tuma keho di e turistanan. Tambe polisnan lo keda circula constantemente den e area aki y lo keda atento pa mira si nan por topa cu e ladronnan cu constantemente ta frecuenta e area aki.
