ORANJESTAD – Cu e meta pa preserva nos historia y herencia cultural pa e generacion di awor y futuro, Minister di Cultura, mr. Xiomara Ruiz-Maduro ta haci un peticion na nos comunidad pa entrega nombernan di e metslanan decorativo na Oficina di Monumento conoci como Monumentenbureau. Poco tempo pasa Monumentenbureau a efectua un estudio di nos casnan floria. E dibuhonan riba e skinannan di e murayan di nos casnan floria a wordo haci dor di e metslanan decorativo den e epoca di 1850-1950. E rapport riba e investigacion aki ta obtenibel na biblioteca.
Na ocasion di e punto mas halto na John F. Kennedy School Aruban Investment Bank NV (AIB), a anuncia cu nan lo financia un obheto dilanti nan propiedad como homenahe na e metslanan di decoracion. E diseño ta haci dor di Monumentenbureau na unda diferente columnan lo bin cu e fam di metslanan. Cada columna lo tin e símbolo mas usa di e Cas Floria.
Minister Xiomara Ruiz-Maduro ta gradici y felicita AIB y Monumentenbureau pa e projecto ‘Homenahe Cas Floria”. Alaves ta comparti e dibuho pre-eleminario di e diseño.
E informacion cu Monumentenbureau ta enbuska of kier confirma, ta e nomber y fam di e metslanan. Tambe si e familiarnan por indica na cua edificio e metsla a realisa su trabao. Monumentenbureau ta situa na Schelpstraat 36-38 y por localisanan na tel: 5835938 of riba nan facebookpage: Monumentenbureau.
