Miembronan di Afpakteam Integral di Aruba a detene riba diadomingo 17 di februari ultimo, un Venezolano di descendencia Chines di 26 aña di edad na Aeropuerto Internacional Reina Beatrix.
E sospechoso a keda sin meld na Aduana cu e tabatin 130.000 Dollar cu ne. Un parti di e cen aki e tabatin scondi den su paña di abao. El a wordo deteni riba sospecho di labamento di placa. E sospechoso tabatin un storia increible y no por a hustifica e procedencia di e placa. E sospechoso a tuma distancia di e cen despues di interogacion.
Tur e placa cu a wordo tuma den beslag ta bin ta bay den e fondo di criminalidad, Criminaliteitsbestrijdingsfonds. Placa den e fondo aki ta wordo usa pa combati criminalidad, loke kier meen cu tur ingreso di e accion aki ta bay directamente pa Aruba. Afpakteam Integral di Aruba ta aporta na esaki na forma visible.
Afpakteam ta un cooperacion entre Ministerio Publico, Cuerpo Policial di Aruba, Fiot (Fiscale inlichtingen- en opsporingsteam) di Departamento di Impuesto (DIMP), FIOD (Fiscale Inlichtingen- en Opsporingsdienst), Koninklijke Marechaussee (KMar), Kustwacht Steunpunt Aruba, Meldpunt Ongebruikelijke Transacties (Meldpunt), y RST (Recherche Samenwerkingsteam). E trabao ta combati criminalidad financiero economico. Crimen no mag di rindi. Riba prome di maart 2017 Afpakteam a cuminza traha. E team por wordo acerca via mail na [email protected] of via e tiplijn na telefon 11141.