Diahuebs ultimo, parlamentario Sue-Ann Ras, tabata presente na e lansamento di e campaña AMI TA DICIDI di Famia Planea Aruba. E lansamento tabata den un forma masha interactivo y educativo, den cuadro di temporada di Carnaval 65. Remarcabel ta cu e programa aki ta completamente relaciona cu e metanan sostenibel. E video di e jingle a ilustra un compilacion di artista hoben, unda a scoge diferente generacion. A opta pa scoge e ritmo di soca, cu elemento urbano, pa yega mas na e hobennan. Un balor agrega na esaki ta, cu lo adapt’e despues di e tempoarada di Carnaval, pa e sigui uz’e durante henter aña.
IMPORTANCIA DI EDUCACION DI SALUD SEXUAL
E topico salud sexual cerca nos hobennan ta keda uno primordial y actual. Salud Sexual mester ta incorpora den nos curiculo nacional, unda ta educa e mucha- y hobennan na un forma responsabel y educativo kico tur salud sexual ta encera. “Ta bon pa enfatisa y aclarea cu salud sexual no solamente tin di haber cu e acto sexual, sino cu e ta representa generacion di e deseo-, sintimento-, fantasia- y emocionnan, di cual ta conduci na cierto comportacion. Pues e desaroyo di un identidad sexual, cu ta permiti e hobennan reconoce y actua debidamente riba e topico aki, specialmente si nos tuma na consideracion cu e topico aki no ta uno cu mayor ta sinti nan comodo pa papia di dje”, Ras a expresa.
Pubertad y desaroyo sexual ta etapa di cambio constante, unda e deseo y e impulsonan sexual ta domina un parti racional, cu no ta completamente desaroya. Segun Ras: “P’esey haya un bon educacion sexual ta sumo importante, no solamente riba corto plazo, pues pa e adolescente supera sin risico su etapanan di maduracion fisico y psikico, sino tambe pa establece e comportacion sexual, cu e lo tin ora e bira adulto. No mester lubida cu durante adolescencia, e hoben ta exponi na riesgo cu e mester evita, mediante e medidanan preventivo.”
WEGA INTERACTIVO
Na un forma dinamico e invitadonan a forma dos grupo pa experiencia un parti chikito di e wega di mesa humano (human board game). E wega ta varia di pregunta habri, cera y debate relaciona cu educacion di salud sexual cu varios topico actual.
Un setup completo cu dj y sonido lo bay e scolnan, di cual e compania Swing Master ta completamente encarga, como parti di nan aporte na educacion di nos hobennan.
Lo tin varios sorpresa pa e hobennan cu forma parti di e “human board game” cu lo ta disponibel pa e scolnan cu ta desea.
Ras ta felicita henter e team dinamico di Famia Planea Aruba y tur cu a brinda nan cooperacion y contribucion pa traha cu nos hobennan cu pasion y dedicacion y ta haci un apelacion na e scolnan, specialmente secundario, pa reserva nan bishita di e programa interactivo wega di mesa humano.