Relaciona cu e anuncio di gobierno cu lo amplia e canasta basico, lider di fraccion di POR den Parlamento, Marisol Lopez-Tromp a indica cu pueblo ta ancioso pa wak cu prijsnan di cierto productonan lo keda pagabel pa nan cartera y cu por cumpra productonan na un prijs rasonabel.
Un keho cu ta bin dilanti riba e punto aki ta cu ainda no tin e control debido riba cierto supermercadonan manera cu pueblo lo desea unda cu ta mira diferencianan grandi den prijs riba cierto productonan. Fraccion di POR ta kere cu ta importante pa tin un debido control riba esaki, apart di anuncia cu a amplia e canasta basico cu cierto productonan cu ta importante y indispensabel pa nos famianan na Aruba.
Lopez-Tromp a indica cu e control aki, segun tin entendi ta tuma lugar, pero lo ta bon pa amplie y tin suficiente personal pa por haci e trabou na un forma cu e por tin efecto. Di otro banda, el a bisa cu ta keda tambe na e consumidor pa dicidi libremente unda e ta haci su compras.