Durante su recorido na diferente scolnan, Prome Minister Evelyn Wever-Croes no solamente a tuma tempo pa conta muchanan di e bida y logronan di Betico, sino a duna di su tempo pa scucha maestronan, cabesantenan y tambe comision di mayornan di scolnan. Como un mandatario, semper mester ta dispuesto pa scucha logronan pero tambe inkietudnan di pueblo henter, den e caso aki, tambe di esnan cu ta traha na bienestar di scolnan na Aruba.
Na su bishita na e scol Colegio San Hose na Santa Cruz, e Cabesante suplemente, Juffrouw Rina Croes hunto cu otro docente y e comision di mayornan, a reuni cu Prome Minister den Koffie Kamer pa asina pone e mandatario na haltura di actividadnan, proyectonan y preocupacionnan cu tin.
Juffrouw Rina a duna di conoce di ta sumamente orguyoso di e bon averahe di comportacion y desaroyo di e studiantenan. Tambe Juffrouw Rina a elogia e comision di mayor, encabesa pa señora Givancka Dijkhoff, pa e dinamismo cu nan ta traha pa e scol. Un comision di mayor sumamente involvi y activo cu proyectonan pa yuda e scol desaroya miho.
Un di e preocupacionnan mas grandi di e comision di mayor ta e estado fisico di cierto partinan di e scol cu e comision ta considera te hasta un peliger pa e muchanan. Nan a indica cu nan no a haya oido cerca e gobierno anterior apesar di a pone e problematica aki na conocemento di e minister anterior sinembargo nada a wordo haci pa e scol.
Tambe e comision ta spera di pronto por soluciona e problema di coriente pa asina por cuminsa instalacionnan pa nan por yega na airco den e lokalnan.
Awo cu Gabinete Wever-Croes ta goberna, e comision di mayor ta sinti mas animo pa bolbe cana e caminda corecto pa asina nan peticion yega na unda cu e mester yega pa asina e scol haya su mantencion y of renobacion adecua.
Prome Minister a gradici e cabesante suplente y maestronan pa e confiansa cu nan a brinde. Tambe el a elogia comision di mayor pa e bunita trabou cu nan ta haci na beneficio di nos muchanan y a encurasha nan pa nan sigui cu e bunita trabou. Hunto nos ta coopera pa pone nos muchanan central y logra un miho futuro pa nan.