ORANJESTAD – E meta final di tur stakeholder den e area di cuido medico aki na Aruba ta pa mehora e calidad di servicio cu ta ser duna na e momento aki. Segun Minister Dangui Oduber, mandatario encarga cu e cartera di Salubridad Publico, nos tur mester di otro pa por mehora calidad di cuido aki na Aruba, referiendo na e profesionalnan como tambe e pashent.
Durante un conferencia di prensa, Director y communicatie en voorlichting medewerker di AZV hunto cu Minister Dangui Oduber a duna un splicacion amplio di e proposito di e aplicacion telefonico di calificacion (Rating App) di AZV. Cu e informacion/data colecta, lo por haci analisis y yuda dokternan identifica problema, cual na su turno ta percura pa solucion.
Siguridad di informacion y identidad di e pashent lo wordo garantisa y cuida na tur momento. Otro pashentnan lo por wak calificacion (rating) y comentario di otro usuarionan pero no por wak ken e persona ta. Alabes, pa evita cu dokternan (of otro proveedor medico) ricibi un calificacion inhusto, cada usuario lo por uza e aplicacion solamente cu nan number di AZV y un codigo di identificacion (password) cu lo wordo duna door di AZV. Unabes cu drenta e aplicacion, e usuario automaticamente ta haya asigna e dokter na unda e ta registra na dje.
Calificacion
E calificacion no ta solamente riba e medico mes, sino e servicio den su totalidad. E criterionan cu lo wordo uza (pero no ta limita na ) ta como lo siguiente:
– Area di recepcion
– Recepcionista
– Facilidad (edificio)
– Servicio duna pa e dokter
– Tempo di espera na e dokter
– Tempo di espera pa haya un afspraak
Door di haci uzo di e diferente criterionan aki, por identifica unda tin posibel problemanan cerca un dokter. E por ta asina cu e dokter ta wordo bon califica pa e servicio cu e ta brinda, pero tin keho riba tempo di espera pa haya un afspraak. Cu e informacion aki, AZV por sinta conhuntamente cu e dokter pa wak con pa soluciona e problema y asina garantisa un servicio optimal na e pashent.
E uzo di un aplicacion asina aki no ta djis pa keho, sino pa brinda oportunidad pa mehora loke ta bayendo robes. Un plataforma unda e informacion ta continuamente ‘al dia’ (up to date) y cu ta baha costonan excesivo pa colecta informacion. Di e forma aki ta baha gasto pa AZV, cual nifica menos gasto pa pueblo.
Por ultimo, e App ta sirbi tambe como medio di contacto entre e pashent y AZV como tambe por wak cua dokter y botica ta na warda. Minister Dangui Oduber ta sumamente orguyoso cu e stap aki grandi, cual ta demostra cu stapnan chikito pero firme, ta trece cambionan grandi pa henter nos comunidad.