Home » Booshi Wever: DEBE Y MAS DEBE  E FINANCIAMENTO DI E “SPROOKJE” DI “WASTE TO ENERGY” LO NIFICA Y LO PONE CU E DEBE DI ARUBA LO POR YEGA NA 125%!!!(parti 2)

Booshi Wever: DEBE Y MAS DEBE  E FINANCIAMENTO DI E “SPROOKJE” DI “WASTE TO ENERGY” LO NIFICA Y LO PONE CU E DEBE DI ARUBA LO POR YEGA NA 125%!!!(parti 2)

by Admin
0 comment 52 views

 

 

Den articulonan anterior UPP a mustra cu keto bai e racha di ENDUEDA pueblo pa medio di financiamento di “SPROOKJES” ta sigui su curso, mientras cu tin otro manera pa bin cu un solucion duradero, sostenibel,  factibel, realistico y mas importante PAGABEL. 

Den e articulo aki nos kier mustra cu “WTE via MASS INCENIRATION” ta mas bien un “SPROOKJE” den tur sentido di palabra. E no ta ni duradero, ni sostenibel y pio ainda e lo bai costa un dineral. Esaki lo bai percura pa nos cuota di debe, lo por yega te na  al rededor di 125%, pa despues bin cu medida pa pueblo paga esaki.

 

Sigur nos mester cuida nos planeta. Pero “Waste to Energy” dor di “Mass Inceniration”  no ta  e solucion mas factibel y ni pagabel! Esaki ta un SCAM, pues un mentira flagrante. Pakico?

 

* Pasobra e no ta bon pa nos medio ambiente! Ni cuanto filter, cu por cierto ta carisimo, ser usa, toch e tipo di instalacionnan aki lo keda emiti gasnan toxico y dañino. Tur esaki ta comproba. Na WEB no ta usa e filternan of “scrubbers” pasobra nan ta hopi caro. Hasta un di e “expertonan” di WEB a bisa cu esakinan ta impagabel. Trahadornan di Astec por bisa cuanto molester e emisionnan aki ta causa.  Y e filternan aki lo NO evita cu gasnan toxico ta bai den nos atmosfera. Di e manera aki lo no cumpli cu pretencion ni e afan pa stop emision di e gasnan toxico aki.

 

* Un otro argumento pa purba di hustifica pa bin cu tipo instalacion asina, ta cu lo por produci fuel pa produci coriente na un prijs abou. Un otro engaño . “Waste to Energy” ta mas bien “Waste of Money”. Ta comproba cu generacion di coriente por medio di e tecnologia aki, ta esun mas caro. Tipo di instalacionnan asina aki a pone hopi presion financiero riba hopi ciudadnan na mundo, manera  Harrisburg, Pensylvania ,USA cu recientemente a hasta a ser sera, pasobra nan a bati bancarota. Pesey ta importancia pa haci un analisis di gasto y beneficio, pa saca afo si e pueblo di Aruba por carga e gastonan prome cu tuma un desicion final.

 

* Tambe nos a trece padilanti den un articulo anterior, cu un instalacion di 6 Megawatt  lo bai costa al rededor di 360 miyon florin y e gastonan di operacion lo no baha bow di 18 miyon pa aña. Nos tin entendi esaki lo ta pa 20 aña, pues un otro 360  miyon. 

Alabes nos a compronde cu WEB lo ta dispuesto pa cumpra e fuel for di e WTE-plant aki pa 8 dolar cent (0.08 cent)pa kilowatt/uur.  Pues un calculacion conservativo lo mustra cu esaki lo genera un entrada di mas o menos $ 4.285 440,=. Esaki no ta yega ni pa paga pa 6 luna pa e gastonan di operacion. Ta conoci cu mayoria di e instalacionnan aki ta draai riba subsidio di gobiernonan, cu otro palabra pueblo lo mester bai paga pa esaki.

 

Aparte di e problema aki, nos sa cu Aruba no ta produci suficiente desperdicio pa pone un planta di 6 Megawatt draai riba su capacidad. Pues nos lo mester bai importa sushi. Hulanda y China  tambe tabata haci esaki  y awor nan a stop cu esaki. 

Ken lo bai paga pa e inversion y e gastonan di operacion? E companianan cu a participa den e “fix-bidding-procedure” no ta institutonan filantropico, pues nan kier nan “return of investment” plus nan ganashi. Analisando henter e asunto aki, tin un solo conclusion: NI Aruba NI e pueblo Arubano tin ningun beneficio “whatsoever” den henter e “SPROOKJE” aki. 

 

Kico si anto? 

Manera ya treci dilanti cu a ser prueba den varios caso den Corte, e sistema di WasteAway di B&L a funciona y cu un inversion di ni 5 miyon florin por pone esaki den operacion bek. E gastonan di operacion di e planta aki ta hopi mas abou cu esun di e “sprookje” di WTE. 

No mester lubida cu a usa e argumento pa hustifica e huurmento innecesario di e edificio di un sponsor na Pos Chikito, cu lo bai usa esaki pa recyclahe. Si bai saca loke por ser recycla for di e desperdicio, e ora ey esaki sigur lo tin consequencia pa e planta di WTE y e ora ey sigur lo no por produci e 6 Megawatt.  

Cu e WasteAway-plant di B&L den operacion, por sigui cu e recyclahe sin cu esaki tin consecuencia grandi pa e produccion di e fluff cu na su turno por ser RE-USA , sea pa yena e tantisimo buraconan cu tin coba aki na Aruba of como compost. En todo caso nos pueblo lo NO wordo endueda atrobe pa financia un otro locura narcista y un “sprookje”. 

Asina aki nos debe nacional, cu ya ta rond di 95% lo por yega hopi liher na 125%. Algo cu e pueblo aki no por sigui carga.

 

Tempo cu nos a cuestiona loke tabata pasa na HOH, ningun hende  kier a tende, paso tur hende tabata kier un solucion pa motibo cu HOH lo ta mucho bieuw y no tabata cumpli cu e rekisitonan pa un cuido medico adecuado. Ningun hende tabata preocupa cu e corupcion y e cantidad di placa cu e proyecto lo bai sali. Wel awe tur hende kier yora malai. Awor ta laat. 

E tempo ey te hasta mi a wordo tilda di ta envidioso. Wel si a tene cuenta cu “envidia” ey, awe nos lo no ta den e situacion actual.

Nos ta convenci cu aki tambe mescos lo bai pasa. Tur hende ta anhela un solucion. E minister astuto aki ta mira un oportunidad unico pa por complace cu algun miembro di su Cartel y a gara e “quick-fix” aki. Y  esnan cu ta victima di mesun maneho cu a ser hiba dor di AVPOR, no ta mucho preocupa cuanto e “sprookje” aki lo bai costa.

No lo straña mi si den e caso aki atrobe ser bisa cu mi tin “zeloos”. Wel ban spera cu mi supuesto muestra di “zeloos” percura pa nos pueblo no wordo endueda atrobe pa  paga pa un “sprookje”!

 

UPP si ta preocupa y nos lo sigui informa e pueblo pa evita cu e minister aki, un biaha mas bai ENDUEDA Aruba y nos pueblo cu un “sprookje”, na unda al final pueblo tin di paga pa algo SIN  cu esaki ta nifica  un solucion berdadero, factibel, pagabel y sostenibel.

Nos ta spera cu Parlamento sali for di nan hol y lanta for di nan “winterslaap” y para e

locura aki na tempo.

Corda kico expertonan ta bisa: “BURNING WASTE IS………WASTEFUL!!!

 

Aruba,  15 januari 2019

Booshi Wever

Lider UPP

Brazil 163

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio