ORANJESTAD – E grupo di parlamentario cu a experencia e reunionnan interparlamentario di Reino, esta IPKO na St. Maarten siman pasa, tabata un grupo relativamente nobo y hoben. Cada pais tabatin nan grupo di miembro nobo, mescla cu algun ‘veterano’. Entre nan tabatin parlamentario pa partido MEP, Sue-Ann Ras, cu a participa den su prome reunion IPKO. Ras a mustra cu aunke ta su prome biaha, el a sa di uza e experencia aki di tal forma, unda el logra crea mas laso politico y conocemento di tanto parlamentario como e temanan alcaso. Y manera cada politico cu ta atende e reunionnan aki pa prome biaha, e tabatin su bista y expectativa.
KICO PA SPERA
Segun Ras, pa hopi aña bo ta tende tocante IPKO y cu den bista di hopi hende, no ta nada mas cu djis un ‘snoepreis’, unda cu nada no ta sosode toch. “Mi mes no tabata sa kico pa spera exactamente, mirando cu lo trata dos topico cu sigur lesando e noticianan y sa e historia politico den Reino Hulandes y e relacion politico cu Hulanda, e cosnan sigur lo ta tenso y cu reto pa logra surpasa e sentimento di deficit democratico”. Ras ta referi na e topico di areglo di disputa y e situacion cu Venezuela, y claro, e relacion entre Hulanda y e islanan di Caribe Hulandes. Loke Ras a bin cu ne, ta algo diferente, y cu un pensamento diferente.
E TOPICONAN
Segun Ras, e prome dia a trata e reunion Tripartite, unda cu cada isla a expresa nan preocupacion tocante e topico di e situacion inhumano di Venezuela y tambe nan punto di bista y sentimento relaciona cu e Areglo di Disputa, cu a haya un bida bek. Esaki despues cu secretario di estado Hulandes, Raymond Knops, a entrega un proposicion di ley, unda no a incorpora tur 3 puntonan esencial di e famoso Mocion Van Laar, cu a haya sosten di 94 miembro di Parlamento den Tweede Kamer na Hulanda na 2016. “Durante e reunionnan di IPKO aki, a duna inicio y mas contenido na e trayecto di e proceso pa decision riba ley di Reino (Rijkswet), cu den cabamento di juni proximo lo ta trata. Den e tratamento aki nos tin e oportunidad pa ta participe como parti di un delegacion special, cu por presenta un mocion y/of amienda, cual ta un derecho tambe cu ta ancra den nos statuut (articulo 17)” Ras a recorda. “Pues ainda tin posibilidad na juni, pa ahusta e ley di Areglo di Disputa, pa completa e 3 puntonan esencial den e ley di Reino aki. Y ta keda na Hulanda pa vota pro of contra y asina e ley por cumpli cu loke tur 4 delegacion a para p’e den e mocion Van Laar” Ras a sigui bisa.
HISTORIA TA RIPITI?
Segun e parlamentario, ta bon pa recorda cu historia por ripiti. Ya cu ta door di un amienda entrega dia 12 di april 2010 di parlamentario di fraccion di MEP: Ady Thijsen y Boshi Wever, a pone cu e trayecto di Areglo di Disputa obligatioramente mester inicia como un instancia independiente cu lo duna conseho vinculante (bindend advies) riba e disputanan huridico (juridische geschillen).
EXPERIENCIA
Pa Ras, ta casi incomprendibel cu ainda, despues di tanto aña, ta reina cierto sentimento di desigualdad, poco comprension y respet entre e 4 paisnan, cu mester a atende sigur diferente topico diferente. “P’esey ta importante pa reconoce cada un su potencial- como debilidadnan, pa asina fortalece e relacionnan aki dentro di Reino Hulandes y traha na bienestar di tur e ciudadonan den Reino” e parlamentario a bisa. Pa Ras, e importancia y potencial di IPKO ta ubica den e posibilidad como partner parlamentario pa coopera, pensa hunto y intercambia conocemento y experiencia. “Di e forma aki sigur nos por reenforsa e relacionnan dentro di Reino y yega conhuntamente na mihor solucion na e retonan cu e paisnan ta confronta en comun” Ras a bisa. Y e trahamento den grupo mas chikito riba cierto topico, sigur lo duna un mihor resultado, e parlamentario ta pensa.
Un cos ta sigur segun Ras, cu e pensamento cu e tabatin di IPKO, ta cambia y e relacion nobo, cu el a cera cu mayoria di e parlamentarionan di Reino particularmente di Hulanda y Corsou, lo contribui pa traha mas efectivo, duradero, fructifero y na beneficio di Aruba y Reino Hulandes.