Dialuna 14 januari atardi, Minister Lampe conhuntamente cu staff di DPS a sinta cu e staff di SPO Sta Cruz y SPO Savaneta. Den e reunion aki, Minister Lampe a duna un splicacion amplio di e plannan cu e tin pa cu e dos institutonan aki.
Despues di su presentacion, esnan presente por a haci pregunta y mas cu claro a vocifera nan preocupacionnan. Minister Lampe duna nan tur e atencion y a contesta y a reacciona riba tur comentario cu e staff tabata tin.
Den e aña na unda cu Gabinete Wever-Croes a declara como aña di Cuido di nos Muchanan, Minister Lampe a splica cu e ta kere cu semper mester tin e mucha central y cu cada mucha mester por haya e oportunidad husto pa por bay e scol di su nivel.
E mandatario di Enseñansa a splica cu cualkier cambio cu e lo por introduci, lo ta a base di ‘input’ di tur esnan involvi den e cambio. E ta kere cu nos tur tin un interes general y esey ta Aruba y pues el a finalisa cu e lo haci uzo di tur e forsa laboral cu e tin disponibel den enseñansa, pa sirbi e bienestar general.