Aeropuerto International Reina Beatrix – Diasabra anochi den careda di 9’or transportwagen y recherche di Noord a bay Airport.
Un homber busca pa nan algun dia caba lo tawata cla pa aborda avion. Segun informacion e buelo pa sali e momento ey tawata Insel Air cu lo mester a bay Boneiro, y despues Corsow.
Por a mira recherchenan di Noord, cu a sali cu e sospechoso cu a wordo hiba warda di Shaba.
E homber aki diasabra merdia tawata envolvi den e un caso di hit and run, pabou di e Kapel di Tanki Leendert. Despues di e ocasiona un accidente serio ela baha y core bay.
Polisnan a busca den e area pero no a logra haye.
Den luna di december e homber aki lo tawata envolvi den un otro caso na Tanki Leendert tambe, unda e lo kier a mata su pareha, cu ta un dama Hulandes.
E dia ey ela logra huy tambe, y na final e dama Hulandes a desmenti tur cos dilanti polis.
Amiganan di e dama e marduga ey a conta polis tambe cu e homber aki cu lo ta di nacionalidad Dominicano, posiblemente tawata envolvi den un caso di maltrato cu arma den area di Hotzone.
Pues asina nos por mira cu tin diferente caso cu husticia mester di e homber aki. Diasabra anochi ela purba sali di e isla mirando cu elo ta na altura cu e ta wordo busca, pero no a logra.