Ministerio Publico di Aruba a publica recientemente su Jaarplan 2019. Den e Jaarplan, Ministerio Publico ta wak dilanti pa 2019 y tur e metanan, actividadnan y resultadonan cu tin planea pa e aña venidero. E metanan, actividadnan y resultadonan aki a wordo menciona parcialmente caba den e Vision Strategico 2018-2022.
Ministerio Publico ta mustra cu su Jaarplan na ki manera lo aporta na un manera efectivo na engrandece seguridad na Aruba.
Banda di e Jaarplan, Ministerio Publico a publica su relato anual pa 2017.
E Procurador-General a bisa den un carta pa personal di Ministerio Publico cu e ta orguyoso di e Jaarplan pa 2019 y tambe di tur e trahadornan pa e trabao cu nan ta haci cada dia.
Ministerio Publico a conoce logronan grandi den e ultimo añanan den combati criminalidad subversivo na Aruba, entre otro, dor di lanta e Afpakteam y e Unit Mensenhandel y Mensensmokkel.
Den e teamnan aki ta traha intensivamente hunto cu e otro partnernan den e cadena hudicial.
Tampoco no a perde di vista e otro areanan di atencion, manera e lucha contra crimennan di high impact.
Un di e desaroyonan mas importante na 2018 tabata e realisacion di Veiligheidshuis na mei 2018. Veiligheidshuis tin como meta principal e lucha contra molester, violencia domestico y criminalidad. Esaki dor di traha hunto cu e partnernan den e ramonan di cuido, husticia y di esnan cu ta traha den comunidad. Desde cu Veiligheidshuis a lanta, a tuma varios caso, cu a wordo treci aden pa e diferente partnernan. Veiligheidshuis tin un rol importante den traha cu specificamente hobennen na riesgo pa cay den mal caminda y famianan na riesgo.
Ministerio Publico a inverti e ultimo aña den profesionalizacion di e organisacion y e personal. Un di e highlightnan pa e trahadornan di Ministerio Publico tabata cu a muda pa un edificio nobo na September 2017. E mudamento a marca un comienzo nobo den e capitulo di bringa criminalidad na Aruba.
Na 2019 Ministerio Publico lo sigui riba e caminda aki: traha intensivamente pa realiza e ambicionnan den e Jaarplan hunto cu nos partnernan.