Home Police Afpakteam: Findishi tabata exito

Afpakteam: Findishi tabata exito

 

Awe tabatin findishi di un cantidad di obheto cu a wordo confisca pa Afpakteam, entre nan, tres brommer, cinco auto, un speedboat y un oloshi.

E placa cu a gana cu e venta aki ta forma parti di e total di capital criminal cu a wordo kita for di hende (afgepakt) e aña aki pa Afpakteam.

 

E findishi tabata hopi exitoso. Casi tur cos a wordo bendi, cu excepcion di e speedboat. En total a gana mas di 61.000 florin. E suma aki lo wordo hinca den Fondo di Combati Criminalidad (Criminaliteitsbestrijdingsfonds) y lo wordo usa na benificio di e lucha contra crimen na Arubaa.

 

E findishi a tuma lugar na Garage Cordia Aruba. E organizacion y tramitacion tabata den man di Koninklijke Marechausse (KMar) y a tuma lugar bao guia di oficina di deurwaarder Roos.

 

Afpakteam a wordo lanta riba prome di maart 2017 y ta un cooperacion entre Ministerio Publio, Cuerpo Policial di Aruba, Aduana, Fiot (Fiscale inlichtingen- en opsporingsteam) di Departamento di Impuesto (DIMP), FIOD (Fiscale Inlichtingen- en Opsporingsdienst), Koninklijke Marechaussee (KMar), Kustwacht Steunpunt Aruba (KWCARIB), RST y Meldpunt (Meldpunt Ongebruikelijke Transacties).

Afpakteam a laga pone beslag riba cosnan na valor di 6.6 miyon florin desde cu el a wordo lanta.

Di e suma aki 1.7 miyon florin a wordo traslada pa Fondo di Combati Criminalidad di Aruba.

 

Crimen no por rindi pa ningun hende!