APA ta sinti un orguyo grandi di por a adopta e rotonde di L.G. Smith Blvd cu ta cay net banda di nan. Esaki ta un forma pa bisa danki na pueblo di Aruba pa e apoyo cu di un of otro forma a brinda na e entidad aki, ta loke cu e director ing. Jossy Figaroa a bisa despues di e ceremonia.
Ademas cu e ta un forma pa gradici pueblo di Aruba, e ta bira alabes un atraccion adicional pa nos bishitantenan cu di e forma aki ta gosa di e creatividad den e decoracion cu tabata den man di e propio empleadonan di APA. Figaroa a splica cu a laga tur cos den man di e trio dinamico y a pidi nan “sorprende nos” y esey tabata e caso tambe na momento cu tur e luznan a dal cende. “Un biaha mas nan a sorprende nos cu nan imaginacion.”
Decoracion y iluminacion di e rotondenan na Aruba, y principalmente di e rotonde banda di APA, ta un tradicion caba pa den tempo di december haci Aruba mas bunita cu e ta. Casnan rond mes ta menos ilumina manera antes, pero door di contribucion di e diferente companianan cu ta entre otro adopta un rotonde ta haci cu Aruba ta keda ilumina toch cu e luznan colorido hunto cu iniciativanan di Gobierno tambe. “Mi ta contento cu esaki ta e parti cu nos por contribui cun’e y sigui hacie pa hopi aña mas.
Figaroa den nomber di APA a desea na prome luga tur su empleadonan y pueblo di Aruba un feliz Pasco y un bon aña nobo.
E trio dinamico cu tabata encarga cu e proyecto aki tabata Sira Werleman, Rosie Arends y Marianella Loefstop. Nan a percura pa realisa e diseño y ehecucion di e trabounan y e ceremonia di apertura. Werleman den su discurso a gradici Jossy Figaroa y Humphrey Tromp pa e confiansa deposita den nan. Nan a haya ayudo di e grupo di Chas Wong, di Day & Night Crew di APA cu a duna un man grandi. Cada un a pone nan fantasia pa hacie algo extraordinario. Esaki ta di 4 aña cu e team dirigi pa Sira Werleman a bin ta haciendo e decoracion desde cu APA a adopta e rotonde di LG Smuth Blvd.
E decoracion ta encera e caracteristicanan di celebracion di Pasco, combina cu e barco cu anker cu ta representa e trabou cu APA ta haci pa e economia di Aruba sigui draai.
Despues cu e luznan a wordo cendi oficialmente, a sigui un rato ameno hunto cu e trahadonan.