Dialuna mainta Parlamento a cuminsa trata e presupuesto supletorio 2018 den un reunion publico y miembro di fraccion di AVP, mr. Drs. Arthur Dowers a mustra cu ta bon pa pueblo keda den estado di alerta, mustrando cu ora Prome Minister Wever Croes ta predica, pueblo tene bo cartera.
“Nos por a mira siman cu a pasa otro show ya cu e gobierno aki ta uno di show, caminda a bin ta gastando mas di 130 miyon florin mas compara cu presupuesto 2017 y esaki ta e gobierno cu a sigura pueblo cu nan ta bay baha gasto, cu nan ta bay goberna sin medida pero caminda pueblo por a mira y sinti e pakete di medida pisa cu nan a impone riba pueblo.
Awor un biaha mas gabinete Wever Croes ta trata di gaña pueblo cu nan ta bay baha gasto pa nos pueblo pero laga nos ta consciente di loke ta pasando sigura ora cu gobierno ta bisa cu e reforma fiscal gobierno ta duna e ciudadano 20 florin extra den su cartera pero e sistema nobo di impuesto ta kita 200 florin di otro banda.
Ta mescos cu strooi santo den wowo di pueblo pa di otro banda saca of ranca un suma di 180 florin adicional hortando pueblo di e forma aki. Mi ta kere e situacion aki ta algo cu pueblo tin cun compronde, cu pueblo mester ta consciente y pa tal motibo nos ta sigui informa pueblo cu loke MEP ta haciendo na e momentonan aki, fuera di a gaña votadonan caba durante di campaña electoral, ta sigui trata di manipula pueblo cu trikinan cu solamente lo beneficia gobierno y famia y amigonan.
Ta dificil pa pueblo wordo manipula di e forma aki caminda gabinete Wever Croes ta pretende di ta yudando pueblo pero al contrario ta sigui ranca placa na granel for di cartera di pueblo.
Nos ta sigur cu e gobierno aki lo sigui desangra pueblo, sigui pone pueblo sufri pero lo yega e momento cu nos tur lo tin cu biba cu e consecuencianan di e sufrimento cu ta wordo crea.
Prome minister Evelyne Wever Croes, manera mi a yega di bisa caba, ta un lobo den lana di carne y aki nos por bisa tambe manera e proverbio di “ora cu Evelyne ta predicando cu e ta hincando placa den cartera di pueblo, tene e cartera ey duro pasobra ta bay e ta bay cune, saca placa for di dje, lagando pueblo cu awa n wowo, ora cu pueblo realisa cu nan a wordo engaña pa di tantisimo biaha caba.
Esunnan cu a kere den nan durante di campaña pero kendenan by now a mira e berdad di nan, caminda awor nan mes ta bin dilanti y declara cu loke nan a haci a causa problema pa hopi hende den pueblo, papiando un tempo cu su pakete di medida ta solamente un prikkie pero awor cu e prikkie a resulta hopi dolor pa pueblo, awor nan ta bin bisa pueblo cu den futuro nan lo no por mira mas cuanto placa gobierno ta ranca na BBO y BAZV riba recibo y ta solamente pueblo tin cu paga pa friends and family sigui gosa.
Gobierno di Evelyne por kita y sconde e cobransa di BBO for di riba recibo pero nos di AVP lo sigui tur dia recordando pueblo di e abuso aki cometi pa un gobierno cu nunca tabata sincero cu pueblo , ningun momento a tuma consideracion cu nos hendenan y awor ta pretende cu nan lo drecha cos, cu nan lo percura pa esunnan di menos recurso keda cu 20 florin den su cartera mientras cu di otro banda ta ranca 180 florin for di mesun hendenan aki,” Parlamentario Arthur Dowers a declara finalisando cu entre otro tin mas medida na caminda den proximo dianan.