ORANJESTAD, Aruba – 30 di November 2018: Un di tres conseho di CAFT a keda publica riba e maneho financiero como tambe riba prespuesto. Despues di e conseho riba presupuesto supletorio 2018 y riba presupuesto 2019, CAFT a publica su conseho riba e asina yama uitvoeringsrapportage. Esaki ta un informe cu gobierno ta duna riba ehecucion di presupuesto pa e di tres cuartal di 2018. CAFT ta constata cu gastonan di gobierno a aumenta cu 100 miyon florin na 2018 compara cu e realisacion di 2017.
Di e suma aki e gastonan di huur di edificio, gastonan di ekiponan di oficina y servicionan cu gobierno ta adkiri, a subi cu 14% compara cu aña pasa, asina Parlamentario di Fraccion AVP, Richard Arends, a indica. Esaki ta ekivalente na 24 miyon di florin. Gastonan di personal a subi cu casi 7 miyon di florin compara cu aña pasa. E aumento di gasto door di e Gobierno actual a wordo constata anteriormente door di fraccion di AVP, pero awor CAFT ta reitera esaki. De mes manera Raad van Advies tambe a constata esaki riba presupuesto 2019.
CAFT a cuminsa aplica caba e asina yama begrotingsregels, e reglanan acorda cu Gobierno Hulandes riba e manera con Gobierno di Aruba mester aloca e fondonan, cu mester a drenta na vigor na hunto cu prespuesto 2019. Sinembargo ta mira cu den presupuesto 2018 CAFT ta aplicando esakinan caba. E reglanan nobo ta consisti di un separacion di entrada y gasto. Na momento cu tin gasto structural no por compensa ni cubri esakinan cu di gastonan incidental. Literalmente e conseho di CAFT ta bisa: “Door de landen is afgesproken is dat meevallers in de inkomsten ten tijde van een financieringstekort volledig ten gunste van tekortreductie komen. Dit is in lijn met de eerder gemaakte afspraken.”
E conseho aki a hala e atencion di e fraccion AVP pasobra e no ta algo cu CFT ta exigi.
Ta gobierno mes a compromete na dje di aloca tur entrada incidental of gastonan no realisa, pa aloca e espacio financiero aki pa reduccion di deficit. Como cu Gobierno no a inclui e posible entradanan adicional di un reforma fiscal den e presupuesto, esakinan tambe lo por wordo considera como entradanan inespera cu lo mester wordo aloca pa reduci deficit den nan totalidad. Gobierno a hasi palabracion nan aki contra deseo di Parlamento, ja cu e mocion presenta door di fraccion di AVP cu tabata contene e peticion aki a wordo rechasa pa partidonan cu ta sostene e coalicion.
CAFT a señala cu inversionan di 35 miyon florin cu lo no por wordo realisa mirando e tempo cortico cu falta prome cu anja caba, mester wordo kita for di presupuesto. Como cu ta trata aki tin un gasto no-realisa, e ta wordo considera como algo imprevisto y invidental. Gobierno a palabra cu Hulanda cu esakinan mester wordo aloca na reduccion di deficit den su totalidad. Fraccion di AVP ta wardando riba gobierno su reaction riba e asunto aki.
Compara cu añanan anterior bou partido AVP y bou ex minister Bermudez, tur aña na oktober tabata cera e administracion y no tabata permiti drenta ningun contrato. Ta mira e gobierno actual a pone esaki un banda, pasobra ta sigui sera contractnan y hasi compromisonan financiero lew den anja. Esaki ta haci e trabou pa mantene e administracion financiero door di Directie Financiën mas complica y dificulta e control necesario.