Rotavirus afectando salud nos muchanan Labamento di man ta di sumo importancia

ORANJESTAD: Den e ultimo luna, Departamento di Salud Publico a tuma nota di un crecemento den casonan di diarea y sacamento bou di muchanan di 0 pa 7 aña.  Den mayoria di casonan raporta ta trata di muchanan entre 1 cu 4 aña y e causa principal ta Rotavirus confirma door di laboratorio.

E sintomanan di Rotavirus ta diarea,  keintura, sacamento y tin biaha dolor di barica cu por conduci na deshidratacion y hospitalisacion pa un averahe di 2 pa 3 dia.

Rotavirus ta wordo transmiti via boca door di mannan, obhetonan, cuminda y bebida contamina cu pupu di un persona infecta. E lugarnan mas comun pa transmision di Rotavirus ta na cas, creshe of scol.

Baby y mucha chikito por transmiti Rotavirus for di 2 dia prome te cu 8 dia despues cu diarea cuminsa. Den caso cu un baby of mucha chikito tin diarea, ta hopi importante pa mantene un bon higiena general. Esaki ta ensera cu muchanan mester laba nan mannan bon y frecuentemente cu awa y habon, principalmente prome cu come y despues di bay baño.

Adultonan tambe mester laba mannan bon despues di atende cu un mucha malo, prome cu prepara cuminda of bebida pa muchanan y tambe mantene tur obheto cu muchanan ta hunga cu ne limpi door di labanan cu tiki desinfectante.

No tin tratamento specifico pa Rotavirus, ta keda unicamente e curpa pa deshaci di e virus pasobra antibiotica ni tampoco antiviral no ta yuda den e caso aki. Si un baby of mucha ta malo haci e maximo  esfuerso pa tenele na cas. No hiba un baby of mucha  cu diarea creche of scol, pa evita cu mas mucha ta keda infecta. Ta sumamente importante pa mantene e baby of mucha chikito cu diarea bon hidrata door di dunanan hopi likido pa bebe preferibel awa of Pedia Lite pero no duna mucha ningun tipo di bebida pa deporte.

Si e mucha ta presenta sintomanan manera boca seco, hopi sed, ta orina tiki, ta slap of ta sin animo, keintura mas cu 40 grado, dolor fuerte den barica of tin diarea cu slijm of sanger consulta cu bo dokter di cas inmediatamente.

Ta di sumo importancia pa nos siña nos muchanan e custumber di laba man na un edad trempan. Pa evita malesanan manera ta e caso di Rotavirus.