Parlamentario Endy Croes no ta di acuerdo na e manera cu Hulanda ta trata Aruba y ta haña hasta cu Hulanda ta trata Aruba na un manera DISCRIMINATORIO. Esaki ta conclusion di Parlamentario Endy Croes lesando e Protocol nobo. Ta incomprendibel cu Hulanda a ‘staat erbij te kijken’ momento cu CAFT (na nomber Hulanda) a haci un trabao bochornoso pa laga AVP kibra e pais aki financieramente creando e desaster financiero y e Mega Debe. Un KB a bin na 2014 hustamente pa purba frena e fiesta, esta Feestvierend Ten Ondergaan. Despues di e KB na 2014 a sigui un protocol 2 mei 2015 y e LV LAFT pa asina duna Hulanda e poder legal pa supervisa y trata na yuda scapa Aruba di e gobierno di mas malo den historia di Aruba di Mike Eman y AVP.
E berdadero cara di Hulanda
No obstante tur esaki bou supervision di Hulanda (CAFT), AVP a sigui derocha placa di e pueblo redoblando e debe di 2 BIYON florin pa mas di 4 BIYON florin den solamente 8 aña di AVP. Esaki a causa cu nos debe nacional desde 2008 cual tabata 42.7% a alcansa alrededor di 90% di GDP, esta cu di cada florin cu drenta caha di gobierno na belasting 90 cen ta bay pa paga debenan di Mike Eman y AVP. Pues tempo cu CAFT mester a controla y mester a “sweep” Mike Eman pa e desaster cu el a causa, Hulanda a scoge pa den tur e bagamunderianan aki invita Mike Eman pa bay lobby pa un puesto den Nacionnan Uni pa Hulanda. Esaki ta e berdadero cara di Hulanda. E homber cu a grita nan y yama nan pa “verkrachters” ora cu e tabata den welga di hamber ta wordo premia na final pa mama Hulanda.
CAFT a faya barbaramente
Awe esnan cu tin tur bon intencion manera e Coalicion actual cu a demostra esaki den nan promer aña di gobernacion cumpliendo “onder de streep” cu tur nan promesanan indirectamente mediante un protocol ta wordo mal mara. Laga e mensahe aki yega bon cla Hulanda cu PUEBLO di ARUBA no por sufri pa un mal supervision y kisas cooperacion di CAFT. Parlamentario Endy Croes a splica cu tabata tin un eleccion democratico unda Pueblo a eligi su Parlamento. Tambe Parlamentario Croes ta splica cu su persona a cana cas pa cas bishitando masha hopi hogar y ta consciente kico ta e dolornan cu pueblo ta bibando aden. “Mi no a mira CAFT, esta Bakker e tempo aya ni Gradus actual presidente di CAFT tampoco ministernan di Rijksministerraad drenta ningun cas. “Cu esaki mi kier splica cu den nan oficina na Den Haag ta imposibel pa bo tuma decisionnan riba conseho di un CAFT cu a faya barbaramente anto kere cu e Coalicion aki mester ehecut’e a pie de la letra.
Zachte lening no ta costa Hulanda nada
Como Parlamentario cu a pasa door di un proceso di eleccion democratico y den un Pais cu ta respeta su estado di derecho ta keda na Parlamento pa determina con lo atende cu esaki mediante Ley protehiendo nos conciudadanonan y suavisa asina e dolor pa henter pueblo. Parlamentario Croes ta splica cu nos kier mira un mehoracion y un solucion structural pa cu nos finansas publico pa asina corigi e maneho incidental y artificial cual CAFT a permiti e gobierno anterior di AVP desde 2015. Pues conta cu esey ta nos meta pero alaves tin mas caminda pa yega Roma y no necesariamente e pensamento di Hulanda ta e unico bon na mundo. Solamente e hecho di no considera Aruba pa inscribi pa e zachte lening cual no ta costa Hulanda ningun cen ta bisami hopi di Hulanda mientras Corsou y St Maarten si ta bin na remarke. Segun Croes esaki ta muestra di discriminacion y alaves un mal mama. Pero lagando tur cos un banda, den Parlamento nos lo atende cu Laft na fabor di Pueblo.