Ministerio di Asunto Social a clausura tur su actividadnan di aña 2018 den curason di San Nicolas. Un actividad cu di berdad a surpasa tur expectativa na asistencia y ambiente. Cu bahada di solo, e tononan di gaita a cuminsa zona, combina cu e bunita decoracion, cu a resulta den un tremendo esfera.
E team di Ministerio di Asunto Social y Labor a traha dia y nochi cu a haci e evento aki asina exitoso. Colega Minister di Infrastructura a percura pa decora e cayanan di San Nicolas. Colega Minister di Husticia a percura pa asistencia di Brandweer pa asina por a logra arma y cende e luz di e kerstboom mas grandi di Aruba. SNBA a contribui na haci e actividad aki posibel. Comercio di San Nicolas tambe a contribui grandemente. Pues tabata den cooperacion y union cu e actividad aki a bira algo asina grandi.
Pa Minister Glenbert Croes, e realce di e celebracion aki, ademas di a cende e luz na momento di devela e kerstboom di mas grandi di Aruba, tabata e momento cu 500 mucha di San Nicolas a ricibi un regalito for di man di Sinterklaas.
Un actividad na honor di e pueblo di San Nicolas y di Aruba en general, cu por a sinti e aire fresco suplando riba Aruba, cu Gobierno di Aruba ta trahando cu alma y curason pa drecha y mehora unda cu a keda destrosa.
