ORANJESTAD, 20 di november 2018 – Desde luna di luna di augustus ultimo, e presupuesto di 2018 di e Tourism Product Enhancement Fund (TPEF) a wordo trata y aproba. Un di e proyectonan cu lo wordo realisa pa medio di e fondo aki ta e Malmok Boardwalk, cual lo crea un area cu miho siguridad pa tanto e peaton como e ciclista.
Segun Minister Dangui Oduber, e idea tras di e boardwalk ta pa tur esnan cu ta uza e area aki, tanto e turista como e local, por sintinan mes sigur na momento cu nan ta haciendo ehercicio of recreaciona. Importante di e proyecto aki ta cu a tene completamente den consideracion e parti ambiental, evitando pa causa cualke tipo di daño posibel na e area aki. Bou guia di e comision di TPEF, den cooperacion cu DOW, lo percura pa e area entre Fisherman’s Hut y e crusada di Malmok, bira uno atractivo pa un y tur.
Na e momento aki ta enfocando riba e coordinacion ya cu apart di crea un infrastructura confiabel pa e peaton y e ciclista, lo percura pa ilumina e caminda pa California Lighthouse, unda cu actualmente tin 27 palo di luz fuera di funcion, lagando e caminda totalmente sin iluminacion. Pa e mandatario ta importante pa tene na cuenta cu Aruba ta e di dos pais na mundo cu ta depende completamente di Turismo como entrada principal. 82% di nos GDP (fuente di entrada) ta bin di Turismo y no por haci wega cu esaki. E vision di Minister Dangui Oduber ta pa eleva e calidad di Turismo, eleva producto Aruba, pa eleva e nivel di servicio cu nos ta duna, pa cual motibo e inversionnan aki ta di sumo importancia.
“Cu e proyecto aki, a tene tur factor den consideracion. Aunke como e mandatario encarga cu Turismo, mi prome yamada ta pa percura cu e Turista sintie na cas, mi ta sinti cu no por neglisha nos hendenan local. Nos tambe gusta ta turista riba nos mesun isla. P’esey, e inversion na area aki ta tanto pa e turista, como e local disfruta di dje”, Minister Dangui Oduber a expresa. E mandatario ta bisa cu “contrario na e gobierno anterior, e gobierno aki di gabinete Wever-Croes si a bin pa cumpli cu su pueblo”.