Dialuna 19 di November Minister Glenbert Croes conhuntamente cu Sra. Yvonne Bermudes di Comision Derecho di Mucha, den compania di dos mucha, a haci apertura di un siman di celebracion reconociendo derecho di tur mucha ancra den e tratado internacional di Nacionnan Uni.
E mandatario a reconfirma durante su rueda di prensa na Parke Curason na Jaburibari, su compromiso di sali na vanguardia di e derechonan sagrado di tur nos muchanan manera e.o. siguridad, proteccion, amor, educacion, enseñansa, tur e derechonan basico universal.
Den un Parke yena cu actividad a habri e siman di celebracion. Riba e mesun dia aki tabatin e 3er edicion di Bus di Alegria, un proyecto di Ministerio di Asunto Social y Labor, cu tambe a para na Parke Jaburibari pa e muchanan por a hunga den cuadro di e bunita celebracion cu lo tuma lugar henter siman cu diferente actividad.
E yamada di e Mandatario tabata pa laga esaki ta un momento di auto-refleccion como mayor, familiar, educador, pa haci e compromiso di percura pa hunto nos logra un miho porvenir pa nos muchanan, pa hunto nos logra un existencia sigur awor pa nan, e determinacion di no bira cara pero bati alarma unda tin inhusticia pa nos criaturanan. Hunto como comunidad nos tambe por yuda construi e mañan pa nos muchanan cu awe ta den nos man.
