Ta un momento emocionante pa Aruba Aloe! Despues di hopi luna di estudio intensivo, reformulacion, y hopi prueba, dialuna ultimo e compania aki a lansa su liña di mas nobo di sunscreen a base di mineralnan natural. E liña nobo aki ta desaroya completamente door di Aruba Aloe su team di Research y Development. Un di e beneficionan di mas significante di e mineral sunscreens aki ta cu nan ta bon pa nos medio ambiente y tambe pa nos coralnan. E sunscreen nobo aki ta no tin oxybenzone, pues a hasi uso di mineralnan pa asina e ta menos dañino pa nos coralnan y tambe evita cu ta bleach
esakinan. Aparte di esey, e sunscreen nobo aki ta liber di “nano-particles” tambe, cual ta preveni pa e mineralnan wordo absorbi door di nos cuero.
Aparte di e beneficionan di ta bon pa nos medio ambiente y tambe nos coralnan, Aruba Aloe su sunscreen nobo aki ta contene e famoso Aloe Vera gel hydratante cu ta 100% puro y fresco cual ta wordo cosecha di e mesun veld di Aloe di e compania cu ta situa banda di e fabrica. Esakinan ta hopi resistente pa awa y ta ofrece proteccion di spectro amplio (UVB/UVA) di rayonan solar cu ta malo pa nos cuero. Plus, e sunscreen aki tambe tin Aruba Aloe su holor caracteristico cual ta e holor di coco-vanilia. Durante tempo, e compania aki lo cuminsa saca tur e sunscreens nan cu no ta a base di mineral for di su tiendanan y pa medio 2019, tur e sunscreen nan aki no lo ta disponible mas den Aruba Aloe su tiendanan.
Hunto cu e lansamiento di e sunscreen cu ta bon pa nos medio ambiente y tambe pa nos coralnan, pa subraya nos compromiso pa proteha e coralnan y rif di Aruba, nos a haci un donacion di AWG 10.000,- na e fundacion Scubble Bubbles cu ta un grupo di divers di mucha jong cu ta focus riba yuda restaura rifnan di coral na Aruba. Cu e donacion aki, e fundacion por pone 2 nursery di coralnan y pa medio di esaki, cultiva coralnan nobo. Ademas, Aruba Aloe lo stimula su clientenan pa tambe haci donacion na momento cu nan bay paga den nan. E cliente lo tin e opcion di hasi donacion di $1, $2 of $5 pa asina yuda e fundacion aki cu ta traha riba preservacion di nos bida marino.
Aruba Aloe su team no por ta mas enthousiasma pa trece e sunscreen nobo nan aki, a base di mineral, riba mercado. Sunscreens cu no solamente ta protehe su clientenan di e solo, pero tambe ta contribui na proteha nos rifnan di coral y nos medio ambiente. E compania ta invita localnan y tur huesped di nos isla pa pasa purba e sunscreen nobo aki cual ta disponibel den tur 16 tienda di Aruba Aloe.
Aruba Aloe, cual a wordo estableci na 1890, ta un di e poco compañianan di Aloe na mundo cu ta crese, cosecha y procesa su Aloe na e mesun lugar. E Aloe, cual ta wordo considera e miho Aloe di mundo, ta e base di un coleccion di producto pa cuido pa cuero, solo y cabey, cual constantemente ta creciendo. Aruba Aloe awor aki tin 16 tienda aki na Aruba, y su productonan ta obtenibel pa wordo cumpra riba www.arubaaloe.com (Merca & Canada) y na www.arubaaloe.nl (Europa).