Hunto lo pensa den ki direccion Aruba lo por bay cu Reforma Fiscal
Luna pasa Parlamentario Setty Christiaans-Yarzagaray a participa na e curso Masterclass ‘Belastingstelsel op maat’ cu a wordo organisa pa Raad van Advies. E Parlamentario a keda hopi satisfecho cu e curso aki pa motibo cu Raad van Advies a percura pa diferente stakeholder tanto di e sector gubernamental, NGO’s, como e sector priva bin hunto pa pensa den ki direccion Aruba lo por bay cu Reforma Fiscal.
E Parlamentario a duna un resumen cortico di e discusionnan cu a tuma luga den e Masterclass cu no necesariamente ta e direccion di Gobierno.
Pa añanan caba, diferente instancia, incluyendo instancia internacional manera IMF, a conseha Gobierno pa bay den direccion di belasting mas indirecto. E meta di esaki ta pa alivia e parti social di nos pais na unda cu e lomba mas hancho lo mester yuda carga pa e lombanan mas small den nos comunicad cual tambe ta e concepto di mayoria pais rond mundo. Aruba den e caso aki, a keda un poco atras pa introduci un sistema di belasting indirecto. E diferente regimennan di belasting na Aruba cu ainda ta directo ta entre otro Loonbelasting, Inkomstenbelasting, Grondbelasting ect.
Consehonan cu a sali for di e Masterclass ta pa purba simplifica nos sistemanan di belasting y agrega of combina e diferente tiponan di belastingnan actual. Segun e Parlamentario un ehempel ta BBO, cu en principio ta un belasting indirecto, sinembargo e ta trece complicacionnan cu ne mirando cu e grondslag di BBO, ta e mesun grondslag di BAZV y ta mesun grondslag cu BAVP. Stakeholdernan ta urgi Gobierno pa simplifica esaki pa e motibo princial menciona enteriormente. Tambe ta urgi pa trece otro formato den e sistema di motorrijtuig belasting mirando e cantidad di number di auto cu no ta ser paga actualmente.
Parlamentario Christiaans-Yarzagaray a indica cu esnan cu a participa den e Masterclass ta di opinion tambe cu januari 2019 ta demasiado corto tempo pa introduci un Reforma Fiscal totalmente diferente. Na evaluacion di e cursistanan a resulta cu toch hende ta pensa cu e BBO riba su mes no ta un mal sistema, pero solamente mester simplifik’e mas of te hasta purba elimina e schakkelkoppeling cu tin.
Mester menciona si cu estudio haci pa calcula cuanto schakkels BBO ta experencia realmente ta demostra di ta entre 1.33 y 1.4, kitando e impresion cu tin cu ta paga te cu 3 biaha e schakkel riba BBO. Pues calculacionnan ta mustra cu esaki a yega te maximo 1.4. Ta bon pa menciona cu Aruba ta mas orienta pa brinda servicio na banda di bende producto, mirando con orienta nos isla ta riba e industria di Turismo.
Un otro punto importante cu a wordo discuti den e Masterclass ta digitalisacion pa asina traha hopi mas eficiente. Belastingdienst a indica tambe cu ya nan a cuminsa inverti caba bek den SAP 3 cu den futuro lo bin cu aangiftebiljet digital cu lo kita hopi di papeleria. Digitalisacion y agilisacion di proceso por trece mas placa den caha di Gobierno tambe pues por significa automaticamente mas entrada pa pais Aruba.
E tema di non-compliance tambe tawata punto di discucion. Tin sistemanan di belasting cu no ta hopi biew, manera e sistema di BBO pero ainda tin caminda cu por wordo drecha pa asina hende por cumpli miho. Cu mal cumplimento caba na un of otro belasting ta keda hopi placa sin drenta den caha di Gobierno. Agilisa procesonan di belasting ta haci tambe cu lo por opta pa keda si riba e sumanan mas y miho concentra pa bay di biaha riba sumanan mas grandi cu ta mas eficiente. Traha pues cu belasting grenzen mas halto.
Esaki ta duna oportunidad na esnan di entrada mas abou cay afo totalmente for di e sistema na unda cu lo tin menos aanslag riba lesenaar di e trahado di Departamento di Impuesto y e ora e por tin mas tempo pa ta mas eficiente y efectivo cu cobramento di belasting.
Un otro tema cu a resalta durante e curso ta cu pa 1 di januari 2019 lo no por bin cu un Reforma Fiscal totalmente diferente mirando cu ta bay ta hopi riba man. Tambe cu te ainda diferente departamento di gobierno, sector comercial, NGO’s y tax consultants no a haya oportunidad pa duna ‘inbreng’ na e topico aki. Na final di dia, ora Gobierno pensa y dicidi den ki direccion pa bay, mester consulta cu gremio y busca un plataforma mas amplio pa por tin draagvlak pa esaki y e tempo ta birando corto.
Simplificacion di e BBO y cobransa di BBO ora producto drenta Aruba (na grens) tambe ta un punto cu a wordo discuti den e Masterclass. Tambe a papia cu por link cu un sistema di douane su systema di Asycuda cu ta basa riba categoria di productonan cu ta wordo importa, pa inclui BBO akinan enbes di laga e comerciante bay pague na Belastingdienst eliminando pues e problematica di cumplimento.
E Parlamentario a enfatisa cu tur loke cu a wordo treci dilanti durante e Masterclass ta pa discuti y lo ta consehonan cu lo bay pa Gobierno tambe. Ki sistema cu wordo introduci, lo bin cu cierto cambionan administrativo pa cualkier empresa pa cua motibo tambe mester pensa esaki bon prome cu tuma un decision.
Parlamentario Christiaans-Yarzagaray a elogia Raad van advies pa bin cu un iniciativa asina pa pone un grupo di hende di sector gubernamental, NGO’s y sector priva pensa hunto kico por ta miho pa Aruba.