Diahuebs 1 di november 2018 sigur tabata un dia hopi importante pa loke ta trata e desaroyo y reconocemento di nos dushi idioma Papiamento, na momento cu a bin cu cambio di ley di ortografia, cu na 1976 a keda stipula pa prome vez den un ordenanza di Teritorio Insular di Aruba. Sigur e trayectoria cu a sigui, particularmente e oficialisacion di nos Papiamento na 2003, pero tambe e trabounan inmenso cu a wordo haci pa logra na mehora e ortografia di nos Papiamento, e intentonan pa introduccion di Papiamento den nos enseñanza, no solamente como un vehiculo di desaroyo pa nos muchanan, sino un reconocimento di un di e pilarnan mas importante di nos identidad, ta duna merito na e logro aki.
Sin duda partido UPP, como un partido cu a bin ta purba na conscientisa nos pueblo di e importancia di Arubianismo, sigur ta fervientemente na fabor, pa nos Papiamento haya un posicion mas central den creacion di Aruba nobo. Den creacion di un comunidad unda critico por medio di desaroyo di idioma. Apesar di esaki, nos por constata cu ainda ta keda falta respet na nos idioma. Particularmente pa esnan cu ta bini di afo y cu ta bin busca un biba aki na Aruba, ta abstene pa siña papia Papiamento. Esaki simplemente como un muestra di respet pa e idioma di e pais cu ta recohe bo y duna bo un oportunidad di prospera y progresa. Pero tambe lamentablemente tin hopi di nos mesun hendenan cu te ainda no ta mira Papiamento un igual cu p.e. Hulandes, Ingles y Spaño. Y ey ta unda cu mas ainda e posicion aki ta haci dolor como Arubiano.
Durante di e debatenan den Parlamento, relaciona cu e Ordenanza di Ortografia, nos por a scucha con Parlamento completo, den un union nunca bisto, a para tras di e ley aki, cu sigur ta parti importante den liña di reconocimento di nos dushi idioma Papiamento. Sigur un momento di hubilo cu nos mester para tras di esaki.
Pero durante henter e reunion nos no por a scucha kico lo bay haci pa proteha nos Papiamento, y mas ainda nos ARUBIANO! Papiamento sigur ta parti di e identidad Arubiano. Ta hopi bunita pa bisa cu porfin nos ta asina leu cu Papiamento poco poco ta haya su lugar. Pero tanten cu nos no por proteha e Arubiano e chens ta grandi cu nos Idioma Papiamento lo bira un idioma den extincion. Sigur na momento cu nos fronteranan ta keda hancho habri y cu gobierno ta keda hiba un maneho anti-ARUBIANO.
UPP a comprende cu aña 2019, segun minister Lampe, lo bira “Aña di Cuido”, unda lo enfoca riba e conscientisacion di cuido riba tur nivel y ta pone den e perspectiva aki tambe e.o. e “Cuido di Papiamento”. Pero UPP tin duda cu e forma cu e maneho di admision ta wordo hiba, unda no ta mara esaki na conocemento di nos idioma, nos cultura y nos historia, ta duna muestra di e cuido aki. “Cuido di Papiamento” ta inherente na “Cuido di e ARUBIANO”, cu na e momentonan no ta existi. Minister Lampe mes a indica e situacion na nos isla ruman, Boneiro, unda cu ya caba e Bonerianonan ta den un minoria, y cu esaki por hiba na desaparicion di Papiamentu eynan. Leynan so lo no ta suficiente pa evita cu esaki ta pasa na Aruba, si e maneho di gobierno ta keda anti-ARUBIANO.
UPP ta spera tambe cu maneho di cuido di nos Papiamento, lo enfoca tambe riba cuido di e Arubiano y na mes momento bay pareu cu un maneho real di integracion, unda cu hustamente nos idioma Papiamento mester ta e forsa catalisador di e union tan desea pa nos dushi isla Aruba.