Cosnan ta sigui pasa na Serlimar y por hasta anticipa cu hasta tin trahadonan cu nan pan ta na peliger mirando e maneho cu ta wordo hiba pa e minister encarga y e forma con e ta manehando y hasta manipulando cu e departamento aki.
Parlamentario di fraccion di AVP, Michael Lampe ta mustra cu tin mas hende ta sigui drenta den servicio di Serlimar y cambionan ta wordo haci den e departamento y ta pone hende riba otronan cu tin añanan di servicio caba laborando na e departamento aki.
“Sin duda cosnan no ta bayendo den bon direccion cu Serlimar y e hecho cu siman pasa minister Oduber den nomber di gobierno a anuncia nombramento di un director nobo, a percura pa hopi disgusto y frustracion den e departamento aki ya tabatin hendenan capacita cu por a tuma maneho di e departamento aki sin problema pero no a wordo tuma na consideracion.
Minister a papia di un solicitud habri pero ora cu a nombra e director nobo, e noticia aki a cay manera un banjo di awa frieuw pa hopi cu ta laborando den e departamento aki.
No solamente esey pero ora cu awor ta Sali na cla algun aspecto menos nechi riba social media di e director nobo, ta lanta e pregunta ta ki clase di screening a tuma luga dor di gobierno y dor di e minister y kico gobierno y e minister ta bay haci awor cu tin hasta video bayendo rond riba actividadnan di e director aki.
E disgusto bou di trahadonan di Serlimar ta sigui crece tur dia pa diferente desaroyonan cu nan no ta di acuerdo cu esakinan pero ta wordo intimida pa un maneho dictatorial cu ta wordo implementa pa gobierno y e minister ya cu lo no tuma mucho cos pa manda hende cas manera a bin ta pasando den ultimo 11 luna caba.
Algun luna atras minister a anuncia cu su gobierno a yega na un acuerdo pa huur e edificio na Pos Chikito den cual DTI tabata ubica y tabata keur auto, sin cu tabatin un bista riba e motibo di con esaki a tuma luga pa despues resulta cu esaki ta un fabor haci na un sponsor di campaña.
Pagonan ya caba a tuma luga pa varios luna pa huur e luga aki cu a keda para bashi pa varios luna y diripiente den fin di siman a mira cu a cuminsa verf e edificio aki, otro indicacion cu e sponsor tabata cobra pa un edificio cu no tabata cla entrega, y lo ta interesante pa sa ta kende ta carga cu e gastonan di verf y reparacion cu ta tumando luga den e edificio aki.
Combersando cu varios trahado di Serlimar nan ta confirma cu tin cosnan pasando cu nan mes cu ta trahando den e departamento a wordo confronta cu esakinan tur dia, di hende cu ta bin y hende cu ta bay, sin splicacion y sin claridad.
Decisionnan ta wordo tuma sin consulta y sin discusion caminda practicamente por deduci cu Serlimar a wordo converti den un tipo di ‘grabbelton’ dor di e minister y su gobierno y ta sigur cu lo por spera minister bin pidi mas placa na parlamento pa cubri gastonan di e maneho di e departamento aki manera ya el a haci caba y a ricibi placa apesar cu Serlimar tabata wordo subsidia caba pa gobierno.
Na januari proximo pueblo lo bay sinti mas ainda e aumento di costo di bisa ora cu nan tin cu bay paga pa recogemento di sushi caminda aki no tin ningun concepto conoci, ningun documento a yega parlamento ainda pa wordo studia y aproba riba e intencion aki, pero caminda pueblo por ta sigur cu tur hende lo tin cu bay paga pa nan sushi wordo recogi dor di Serlimar,” Parlamentario Michael Lampe a declara.