ORANJESTAD, Aruba – 28 di October 2018: Recientemente a invita Presidente di Arubaanse Voetbal Bond (AVB), Ing. Richard Dijkhoff pa un reunion na Zurich cu Presidente di FIFA, Gianni Infantino. Ey a elabora riba e desaroyonan positivo tumando luga na Aruba den e deporte Rey, esta futbol. Esaki despues cu e Presidente di FIFA a tuma nota cu AVB ta e prome pais den Caribe cu a entrega un “plan strategico”. E tabata kier a scucha di e Presidente di A.V.B. mes di con a hinca e plan den otro y pa un splicacion mas amplio di e vision pa desaroya futbol na Aruba.
Un di e topiconan cu mas a hala su atencion den e plan tabata e “Youth Development Program” cu ta trahando riba dje. El a haci hopi pregunta y a expresa cu FIFA ta evaluando pa por produci un “blueprint” pa mira con por implementa e mesun plan aki den henter Caribe.
Locual sin duda a sali for di e reunion aki ta e intencion di FIFA pa yuda AVB implementa su plannan. FIFA ta hopi contento cu e direccion cu AVB ta hibando futbol na Aruba. Ey Richard Dijkhoff di AVB a haya un bon oportunidad pa por a splica Gianni Infantino di FIFA riba e cambionan cu ta introduciendo den e campeonato di futbol infantil. Pa prome biaha den historia di futbol di Aruba den categorianan U-5 y U-7 lo no tin un competencia sino mas bien “voetbal dagen”.
E cambio aki ta basa riba e filosofia cu lo introduci pa futbol di Aruba. Un filosofia cu ta basa riba e vision di KNVB di Hulanda. A scoge pa e vision di KNVB pa motibo cu nan ta yudando AVB cu coaching courses, TC-4, TC-3, TC-2 y TC-1. Aruba no por conta riba sosten y colaboracion di KNVB di Hulanda si no ta preparando nos coachnan a base di e vision di KNVB y implementa un otro filosofia den futbol.
AVB a informa e Presidente di FIFA tambe cu Congreso di AVB a aproba e relato financiero di aña 2017. E Presidente di FIFA a priminti cu den e luna di October un delegacion di e departamento di finansa di FIFA lo ta na Aruba pa hunto cu e accountant externo di AVB, traha riba un modelo financiero nobo pa Aruba. Cu esaki AVB lo ta un di e prome federacionnan den Caribe pa cumpli cu e exigencianan financiero nobo.
Tocante Gianni Infantino
Giovanni Vincenzo “Gianni” Infantino di 47 aña di edad ta un administrado di futbol y ta e actual Presidente di Fédération Internationale de Football Association (FIFA), eligi dia 26 di februari 2016 den un sesion extraordinaro durante congreso di e federacion di futbol. E ta e di 9 Presidente di FIFA, despues di Robert Guérin (1904) cu tabata e prome, sigui pa di dos, cu tabata Daniel Woolfall (1906), e di tres tabata Jules Rimet (1921), e di cuater tabata Rodolphe Seeldrayers (1954), sigui pa e di cinco Presidente di FIFA cu ta Arthur Drewry (1956), pero a fayece pa cual a nombra e di seis cu a bira Stanley Rous, sigui pa di shete cu tabata João Havelange (1974), mientras cu e di ocho a bira Sepp Blatter (1998). Den hopi di e casonan tabatin cu a fayece of cu a suspende nan, pa cual tabatin suplentenan tambe. Pero e di 9 Presidente di FIFA a bira Gianni Infantino (2016), di Suisa y Italia, cu tin e puesto te dia di awe.
E ta naci na Suisa, di un mayornan Italiano cu a inmigra eynan. El a studia ley na University of Fribourg y ta domina e idiomanan Italiano, Frances, Aleman, Ingles, Spaño y Arabia.
Ta bon pa bisa cu prome di asumi e puesto den FIFA, e tabata e Secretario General di Union of European Football Associations (UEFA) desde aña 2009. Durante su temporada den UEFA, el a percura pa introduci “Financial Fair Play” y a mehora e aporte comercial na asociacionnan nacional mas chikito. El a supervisa e expansion di UEFA Euro 2016 pa 24 ekipo y a hunga un rol crucial den concipia e UEFA Nations League y e UEFA Euro 2020 cu lo tuma luga den 13 diferente nacion Europeo.
Pa loke ta FIFA mes, Infantino tabata un miembro di e comision di reforma. Na October 2015 el a ricibi sosten di e UEFA Executive Committee pa bay pa e puesto di Presidente di FIFA, pa cual e mesun dia el a confirma su candidatura. El a priminti di expande e campeonato mundial di FIFA pa 40 ekipo. Na februari 2016 a eligi’e como Presidente di FIFA pa un periodo di 3 aña. Cu su eleccion, el a bira e prome Italiano pa ocupa e puesto di Presidente di FIFA.
Gianni Infantino ta casa cu Leena Al Ashqar di Lebanon. E pareha tin 4 yiu.
Tocante FIFA
A funda FIFA dia 21 di mei 1904 y ta e organisacion na cabes di e deporte di futbol, futsal y beach soccer. E ta responsabel pa organisa torneonan internacional, manera e Copa Mundial, cu a cuminsa desde aña 1930 y e Copa Mundial Femenino cu a start na 1991. Mester menciona cu ora a funda FIFA na 1904 tabata pa supervisa e competencianan internacional entre a asociacionnan nacional di Belgica, Dinamarca, Francia, Hulanda, Spaña, Suecia y Suisa. Su oficina principal ta na Zürich y awendia ta conta cu 221 miembro di asociacionnan nacional. Tur miembro di FIFA mester ta miembro tambe di un di e 6 confederacionnan regional, den cual a parti mundo. Nan ta Africa (CAF), Asia (AFC), Europa (UEFA), Norte-Centro America y Caribe (CONCACAF), Oceania (OFC) y Sur America (CONMEBOL).
Tocante AVB
A funda Arubaanse Voetbal Bond na aña 1932 y a afilia na CONCACAF na aña 1986 y despues na FIFA na aña 1988. E ta e organisacion cu ta maneha futbol amateur y profesional riba nos isla, incluyendo e muchanan, hoben, hende muhe y adultonan. E ta responsabel pa e refereenan y e torneonan di futbol organisa pa mayoria liga. Nan oficina ta situa den Compleho Deportivo Frans Figaroa na Noord.