Papiando riba nos studiantenan na Hulanda, particularmente riba e situacion di escases di cambernan pa nan, tema presenta pa Minister Penipotenciario Besaril, Marisol Lopez-Tromp a indica cu ta premira cu lo tin necesidad di riba 40 mil camber pa e aña cu ta bin na Hulanda. Esaki ta significa un situacion dificil pa e studiantenan Arubiano, debi cu ta te na final ta haya sa ken a gradua y ken ta bay Hulanda, un situacion cu ya caba ta wordo biba unda cu tin studiantenan cu ainda no tin camber riba nan mes y cu kisas ta kedando na amigonan of lugarnan temporal.
Parlamentaria di POR ta considera cu ta importante pa Minister di Enseñansa y Departamento di Enseñansa duna prioridad na e tema aki pasobra nos studiantenan no por bin den fin di siman cas bek, manera hopi studiante Hulandes ta haci; ademas Hulanda na e momentonan aki tin un maneho pa loke ta economia cu ta stimula hopi e scolnan internacional na Hulanda y ta stimula hopi pa tin studiantenan internacional na Hulanda. Esaki pasobra nan kier pa haya personanan educa pa bin biba eynan pa por stimula economia, haci cierto trabounan y inverti. E situacion ta asina cu nan a haci nan proceso di admision mas facil pa por ehempel expaths, hendenan cu ta bin di afo pa inverti/ traha cu cierto nivel di educacion.
Tur esaki ta haci cu e mercado di vivenda ta bira mas limita mirando cu mas studiantenan di henter mundo ta bay studia na Hulanda, haciendo e situacion mas preta di loke e tabata caba.
Den cuadro di esaki Marisol Lopez-Tromp ta bay manda preguntanan pa Minister di Enseñansa puntrando riba e pasonan cu e ta tuma pa cu su cartera pa garantisa cu e studiantenan di Aruba por inscribi prome cu nan gradua, inclusive for di algun aña prome, pa nan no ta laat.
Intencion di esaki ta pa e studiantenan di Aruba cu ta bay exterior no sali perhudica, unda cu por ehempel tin un studiante cu lo gradua aki 2 aña y tin pensa di bay Hulanda, pa e por inscribi for di awo caba.
Otro pregunta cu e parlamentaria di POR ta haci no solamente na Minister di Enseñansa, pero tambe na Departamento di Enseñansa ta cual ta e pasonan cu nan ta bay tuma pa e grupo di studiante nobo, pasobra esun cu a bay e aña aki no ta tur a haya camber.
Minister Plenipotenciario y e team di Arubahuis ta haciendo nan maximo esfuerso pa busca un solucion, pero mester ta conciente cu no por kibra hero cu man, mirando cu ta algun siman prome nan ta haya sa ken ta esnan cu a slaag y cu lo bay Hulanda.
Pesey e peticion y pregunta pa wak te unda ta posibel pa por adelanta e proceso di camber pa studiantenan no cu algun luna, pero cu algun aña adelanta, Marisol Lopez-Tromp a declara.
