Minister di Turismo Sr. Dangui Oduber ta sigi cumpli cu su promesanan di campaña, e biaha aki cu e trabounan pa embeyece e “highrise area” cu lo cuminsa diamars 9 di October 2018.
E trabounan lo ta den e area entre di Brickell Bay Hotel y Hostaria da Vitorrio Restaurant. E duracion di e proyecto lo ta di 20 siman, lo embeyece e area aki cu mata, crea areanan pa parkeer, voetpadnan di klinkers y instala iluminacion. E trabounan aki lo wordo realisa den cooperacion cu Minister di Infrastructura, A.T.A. y D.O.W.
Ora e gobierno actual a asumi su responsabilidad a pone como vision cu lo kier atrae turistanan di calidad. Y pa atrae e turistanan di calidad e producto Aruba tambe mester ta di calidad pa asina e turista por haya balor pa su placa. Aruba ta conoci pa ta un destinacion di calidad y e turistanan ta paga hopi placa na pasashi y hotel. Pa e motibo aki producto Aruba mester cuadra tambe cu e prijs cu e turistanan ta paga. Gobierno ta bay sigi inverti den e embeyecemento di area hotelero y e zonanan mas bishita pa turistanan segun Minister Dangui Oduber.
