Nos ta sigui cu pasonan firme y determina pa crea un miho futuro pa tur ciudadano
Nos tawatin un siman di dushi bendicion di awa cero cu a trece aire fresco pa nos. Pa Gabinete Wever-Croes, e siman tras di lomba tambe a trece aire fresco pa nos pueblo. Nos a realisa logronan importante pa bienestar di nos pais. Prome Minister Evelyn Wever-Croes a enfatisa cu e meta di Gobierno di Aruba ta pa crea un miho Aruba pa tur ciudadano na Aruba.
BUREAU INTEGRITEIT: Nos a pone e prome paso concreto pa e Bureau Integriteit y a nombra sra. Amalin Flanegin pa set up e bureau.
“MO-B LAB”: Nos a pone e Mobile Makerspace, “Mo-B Lab”, riba caminda cu lo hiba innovacion den nos barionan y na nos scolnan.
KIDS4BITES: Nos a organisa un otro coding camp pa muchanan di 7 pa 13 aña, pa siña nan traha nan propio weganan y e camp KID PRENEURS pa incentiva e talentonan comercial di nos muchanan na edad trempan. E meta ta pa nos muchanan ta den contacto cu tecnologia na edad trempan pa sigura mas y miho oportunidadnan den futuro.
ENSEÑANSA: Enseñansa a mira cambio importante cu e cambio di edad pa drenta kleuterschool. A reemplasa ‘Colegio toets’ cu e ‘Nationale toets’ cu lo ta den bienestar di nos alumnonan. Y oportunidad pa fiansa di estudio pa bira maestro te na 40 aña. Ademas nos a sera un convenio cu Columbia University pa haci investigacion cu studiantenan y DPL a publica e maneho nobo pa duna mas proteccion di trabou na nos localnan.
SIGURIDAD: Nos a firma un acuerdo di cooperacion pa sigura e frontera entre Aruba y Corsou, y e tramitenan pa nos haya nos propio helicopter ta avansando.
CUIDO MEDICO: Gobierno ta explorando tambe e posibilidad pa amplia cuido medico di AZV na Merca.
ECONOMIA: Y nos ta preparando dos biahe comercial, pa Santo Domingo y Colombia, pa busca inversionistanan pa stimula nos economia.
“Tur e logronan aki a pasa den un siman. Nos ta sigui cu pasonan firme y determina pa crea un miho futuro pa tur ciudadano, y apesar con facil e ta pa cay den discusion cu ex gobernantenan, nos no ta laga nada desvia nos. Nos sa cu nan a laga e pais den decadencia atras, varios instancia independiente a confirma esey. Nan mes a admiti e siman aki con malo nan a laga e pais atras un aña pasa. Nos meta ta crea un miho Aruba pa abo y pa tur ciudadano. Mi tin tur confiansa cu nos lo logra. Un fuerte abraso”, tawata palabranan di Prome Minister Evelyn Wever-Croes.
