E mandatario encarga cu enseñansa Minister Lampe a anuncia recientemente cu e edad pa haya prestamo di Aruba pa haci estudio pa bira docente a wordo cambia di 35 aña pa 40 aña. Esaki sigur ta un bon noticia pa esnan cu a wordo confronta cu e limitacion di edad como tambe pa Aruba teniendo na cuenta di e scarcedad grandi di maestro cu nos tin actualmente na Aruba.
Den pasado nos prome maestronan tawata Frere y Surnan cu tawata bini di Hulanda kendenan a pone e fundeshi di nos sistema escolar. Te ainda nos ta haci uzo di hopi di e scolnan cu nan a traha e tempo aya. Den e tempo aki, ya no tin Frere y Surnan mas cu ta bin di Hulanda pero corectamente nan a prepara nos mesun hendenan local pa ta maestronan di scol. Nos mester ta hopi agredecido na esaki, nos maestronan ta haciendo un tremendo trabou di educa nos futuro generacionnan.
Na Hulanda tambe tin un scarcedad di maestro pa cua motibo cu Aruba no por keda depende riba maestronan di Hulanda pa bin yuda cu nos scarcedad di maestro. E aña escolar aki, solamente 16 studiante a cuminsa nan prome aña na IPA. Esaki mas cu claro no ta suficiente pa cubri tur e necesidad cu nos tin pa e proximo añanan.
E scarcedad den maestro aki, a conduci cu Gobierno di Aruba a dicidi di bin cu un maneho nobo pa locual ta e edad cu por aplica pa un ‘Arubalening’ pa studia pa maestro aki na Aruba. E ley formal pa cu ‘Arubalening’ ta duna te cu 35 aña di edad cu un persona por aplica.
Den acuerdo cu Minister di Finansa, Xiomara Ruiz-Maduro, Minister Lampe a dicidi di bay bek na e situacion di antes unda cu un persona por aplica pa ‘Arubalening’ te cu su 40 aña. Den articulo 33, ley ta duna nos e oportunidad pa haci e cambio aki bou di condicionnan special. Den e caso aki, tin un situacion urgente di scarcedad grandi di maestro. Esaki ta forsa nos pa bin cu e excepcion aki.
Tur esnan cu ta desea pa bira docente y ta bou di e edad di 40 aña ainda, por aplica pa Arubalening. E dos programanan pa studia pa bira docente ta na IPA y na Universidad di Aruba. Pronto lo cuminsa tambe cu un un formacion di asistente di educacion na EPI.
Ya caba tin un grupo di 5 ciudadano cu ta riba 35 aña cu a aplica pa ‘Arubalening’ pa cuminsa nan estudio pa bira docente. Esaki, segun e Minister di Enseñansa ta di hopi aprecia pasobra realmente nos tin mester di mas maestro pa nos scolnan.
“Nos ta spera cu e decision aki yuda cu e problematica di scarcedad di maestro. Un maneho nobo ta conta pa un y tur. Tur esnan cu ta sinti nan mes yama y a wordo confronta cu e limitacion cu ya nan no por bira maestro debi na e edad di 35 aña, for di awo nan por aplica pa un ‘Arubalening’ si nan tin bou di 40 aña’, Minister Armando Lampe a duna di conoce.
Pa mas informacion di con por aplica pa un ‘Arubalening, por subi riba e pagina online di Departamento di Enseñansa di Aruba .`
