Gabinete Wever – Croes ya desde april di e aña aki a mustra cu ta boga pa bin cu moratorium. Mester bin un estudio haci na un forma responsabel cu ta acapara tur consecuencia cu esaki por tin (positivo y negativo). Minister di Desaroyo Teritorial, Infrastructura y Medio Ambiente Otmar Oduber ta splica cu e estudio y reunionnan ta tumando luga aworaki y ta conta cu participacion di Aruba Tourism Authority (ATA). Resultado di e estudio di capacidad di carga lo forma e base pa e ley di moratorium cu kier introduci den prome kwartaal di otro aña.
Gobierno ta para pa haci estudio responsabel, tin un realidad cual ta e cantidad di cambernan comprometi cu Pais Aruba, sinembargo e situacion ta bay hopi mas leu cu e cantidad di cambernan. E ta bay tocante e maneho general pa otrogamento di permiso di tereno, segun Minister Oduber ta splica. Esaki ta locual cu lo wordo atendi cu ne den e proceso/ estudio cu ta andando.
Pa conclui, ‘Importante pa remarca ta cu durante e ultimo 5 pa 6 añanan no tabatin hotel nobo cu a bin Aruba, sinembargo nos capacidad di carga a sigui wordo influencia. Kiermen tin otro efectonan cu tin efecto riba nos capacidad di carga manera entre otro ‘shopping malls’ y ‘real estates’. Pesey ora cu ta trata e aspecto aki, no por considera e aspecto di hotel solamente. Mester un asercamento integral.”
