ORANJESTAD- Problema financiero den famia, hopi biaha door di diferente circunstancianan di bida, costo di bida cu a subi, drop-outs y/of e falta di conocemento tocante maneho di placa, ta keda un di e ayudonan di mas grandi pidi na Departamento di Asunto Social (DAS) su seccion Guia Social.
En conexion cu esaki, Departamento di Asunto Social su seccion Guia Social, a organisa dos mainta titula ‘un mainta cuidando nos cartera’ pa su clientenan. E tayer ‘un mainta cuidando nos cartera’ a keda presenta pa un trahado social di DAS mes. E prome grupo tabata consisti di clientenan di St. Cruz, Paradera, Oranjestad, Noord y e di dos grupo tabata consisti di clientenan di Pos Chikito, Savaneta y San Nicolaas.
Durante e maintanan aki, a siña e clientenan e bentaha y desbentahanan di traha un presupuesto y kico mester tene na cuenta cu ne na momento di traha uno. “Bo por tene cuenta cu entrada extra den bo presupuesto, pero ta miho pa no depende di esaki pasobra entrada extra no ta un obligacion di e doño di trabou”. Esaki tabata un di e tipnan duna na momento di traha un presupuesto. Entrada y gastonan di famia mester keda bon anota pa asina por traha un presupuesto realistico y na un manera creativo uzando bonchi, e trahado social a duna e clientenan e tarea pa parti e bonchinan segun nan diferente gastonan mensual, pa asina nan por tin un miho bista na kico nan famia ta gasta mas.
Despues a sigui elabora riba cambionan di custumber, decisionnan y/of habitonan nobo pa biba mes bon cu menos gasto y debe y a duna hopi tip con pa economisa uzando ideanan simpel pa baha consumo di awa, coriente, gasolin, compras di paña, uzo di airco, bebida y cuminda.
Locual a resalta di e tayer aki ta, cu e clientenan ta habri pa siña y nan tabata hopi activo durante e tayer, compartiendo y dunando otro tipnan valioso. Na momento cu e tayer a termina nan a hasta puntra ki dia e siguiente tayer lo tuma luga.
Departamento di Asunto Social ta bay sigui cu e tipo di tayernan aki pa asina keda educa y informa su clientenan, haciendo uzo di experticio y conocemento den cas.
Na final, DAS kier a gradici tur cliente di seccion Guia Social cu a forma parti di e tayer ‘un mainta cuidando nos cartera’ y kier motiva cada uno pa aplica e tipnan valioso cu nan a ricibi, den nan bida diario. Alabes DAS kier gradici e team di seccion Guia Social cu e tremendo tayer aki y kier sigui motiva su trahadonan pa sigui comparti nan experticio cu clientenan.
Pa mas informacion tocante e tema aki por tuma contacto cu Departamento di Asunto Social seccion Guia Social na telefon gratis 528-1100 of ‘like’ nos pagina di facebook “Departamento di Asunto Social” pa keda bon informa y alabes haya diferente tipnan valioso con pa cuida bo cartera.