Lider di fraccion di MEP sr. Rocco Tjon a tuma nota cu sr. Eman a duna un rueda di prensa extraordinario awe. E kier a papia riba un rapport di Banco Central. E instancia cu for di 2011 a señala cu Eman su maneho tawata irresponsabel y a base di cifranan irrealistico. Sinembargo awe un biaha mas Eman a gaña tur hende pasobra de facto ta politica barata e kier a hunga door di manipula pueblo.
RAPPOPRTNAN IMPARCIAL
Manera ta conoci e maneho desastroso di Eman a conduci cu el a haya un KB na Juli 2014 (KB nr.20467). Esaki tawata door cu pa añanan largo el a manipula pueblo y hiba un maneho financiero y economico desastroso cu a conduci cu awe pais Aruba tin un debe enorme. Lamentabel ta cu Eman no a haci caso di instancianan imparcial Arubano, manera ARA, CBA y RVA cu a señala esaki. Nos tur ta corda con e ex- presidente di ARA a bisa den Parlamento: “si boso no drecha e situacion otro ta bin haci’e pa boso”. E tawata tin rason, pasobra Eman a haya un KB door cu e tawata gaña pueblo y Parlamento cu presupuestonan ficticio. Den e KB nr. 20467 ta papia di mentiranan di riba “honderden miljoenen Arubaanse florijnen”. Ora Rapportnan imparcial, entre otro di Banco Central, tawata alerta Eman cu cifranan cu e ta presenta ta irrealistico e no a haci caso. Segun Banco Central su “statistical digest” crecemento economico bou maneho di Eman na 2015 tawata -0.5% y na 2016 -0.2%. Es decir 2 aña largo no tawata tin crecemento economico. Reacion di Eman riba esaki tawata pa silencia instancianan imparcial manera CBS door di laga nan “bloed dood”.
EMAN CONOCE UN ESTILO DI LIDERAZGO DESTRUCTIVO
Manera ta conoci sr. Eman a core pa debatenan prome cu eleccion. Despues el a sigui core pa su responsabilidad door di no traha den Parlamento. Y aworaki e ta sigui gaña pueblo y trata na manipula pueblo. Un estilo di liderazgo cu falta integridad y ta carece di amor pa e pueblo aki. Liderazgo cu a trapa riba nos estado di derecho y un liderazgo cu a conduci cu Aruba a haya su mes bou supervision financiero. Liderazgo cu a destrui e sector economico, e sector social y nos finanzas publico.
PA CONCLUI
Pa conclui lider di fraccion, sr. Tjon, a bisa nos cu fraccion di MEP ta para pa un politica constructivo. Lo contradeci mentiranan di Eman mes ora pa e no destrui aworaki trankilidad di nos pueblo. Eman a causa suficiente destruccion caba cu a culmina den e crisis social cu nos conoce. E amor cu nos ta sinti pa Aruba ta mucho grandi pa tolera e manipulacion di Eman sigui continua.