Ta cu ki intencion el a manda e debe di 49% pa 93% di GDP?
Nos a tuma nota riba medio social cu Mike Eman a dicidi di papia di un situacion alarmante cu segun Eman Banco Central a indica. Direpente awo si Mike Eman ta lesa relatonan di Banco Central. Pa 8 aña solamente Mike Eman a bira cara pa tur relato y conseho di Banco Central y door di a ignora e instituto aki mes, Mike Eman a manda nos debe di 49% pa 93% di nos GDP.
Na prome luga, ta hopi importante pa recorda Mike Eman cu e unico culpabel di situacionnan alarmante na nos pais ta Mike Eman mes y su Gabinete iresponsabel. Y awo Mike Eman mes kier sali y papia di e situacion alarmante cu e mes ta causante? Ta tuma un gran sinberguensa y cobarde di lanta mainta tempran pa papia disparate cu pueblo y pusha su desaster rib’e Gobierno actual.
Situacionnan alarmante ta e resultado di 8 aña di mal gobernacion na prioridadnan robes. Y Mike Eman no por biba pensa cu e por influencia e pueblo pa pensa cu den apenas un aña e Gobierno actual por drecha tur desaster cu Mike Eman a haci na e pais aki. Gobierno di Aruba den apenas casi un aña a soluciona hopi situacionnan alarmante cu Mike Eman a causa y ta riba e bon caminda pero ainda tin retonan cu Mike Eman a laga atras p’e pais aki.
Nos a tuma nota riba pagina social di Facebook di Minister di Finansa, Asuntonan Economico y Cultura, Xiomara Ruiz-Maduro, e contesta cu el a manda pa Mike Eman. Y pa esnan cu no tin pagina di Facebook, nos kier pone pa tur hende lesa y tambe pa e mensahe aki yega na Mike Eman.
“Sa tin hende sinberguensa na e mundo aki. Abo a redobla e debe di e Pais aki stancando economia desde 2015 y awor abo kier bay papia riba confiansa perdi? Acaso bo no sa cu ora bo debe nacional pasa 60 % di bo GDP bo ta afecta economia di un Pais malamente? Si bo sa esaki, cu ki intencion ABO a manda e debe di 49% pa 93% di GDP?
Claro cu awor TUR hende ta sinti e peso aki cu ABO a pone riba nan lomba. Pero awo bo kier papia riba un rapport cu Banco Central a traha na juli p’asina bo manipula bisa cu comercio no tin confiansa den e Gobierno actual. Bay ta sin gevoel.
Si bo tabata hende drechi cu consenshi lo bo a baha cabes, pidi despensa pa e desaster cu ABO a laga atras pa e Pais aki. Ora Banco Central a bisa bo na 2011 cu nan ta mira deficit y debe nunca antes bisto, bo a mira otro banda y bo no a yama conferencia di prensa. Paso e tempo ey bo a opta pa grita tur hende of paga nan cu placa di Pueblo pa nan sconde e berdad of manipule.
Pero awe cu bo ta perdi, bo kier bin papia y purba schuif bo desaster rib’e Gobierno actual. Ta cobarde ta actua asina. Danki Dios cu Aruba a scoge un otro rumbo. E situacion no ta facil, pero nos no ta scoge pa bay muri bou palo. Nos ta pone man na obra y traha pa scapa e Pais aki…#MinFEC”.
Mike Eman mester tin berguensa di sali for di su cas pa papia asina tanto disparate riba un solo mainta. Loke Eman mester haci ta pidi despensa na e pais aki pa e desaster cu el a causa nos pueblo. Awo nos tin un Gobierno drechi cu dia den dia afo ta traha pa saca e pais aki di e abismo financiero cu Mike Eman a causa. Ta pa e motibo aki mes pueblo a rechasa su maneho un aña pasa, pasobra pueblo sa cu si Mike Eman a keda, nos pais lo no a sali for di e problemanan financiero enorme cu Mike Eman a laga atras.