ORANJESTAD – Minister di Finansa, Asunto Economico y Cultura, sra. Xiomara Ruiz-Maduro, a haci apertura oficial di e Summit Ministerial Post COSME di e Paisnan cu e status LGO den Caribe riba diaranson 19 di september. Meta di e Summit aki ta pa dialoga riba e opcionnan pa por continua cu e bon colaboracion y netwerk cu a crea durante di e implementacion di e programa di COSME durante e añanan 2015-2018.
E programa COSME a wordo financia cu fondonan regional di Union Europeo pa fortalece e empresanan chikito y mediano den e Paisnan LGO den e region di Caribe. Ta hopi empresa chikito y mediano na Aruba a participa den curso y training cu a wordo duna door di consultants cu a wordo facilita door di Departamento di Asunto Economico via su unidadnan di IDEA y EXPRODESK. Diferente departamento di Gobierno tambe a participa den varios curso via di e programa aki. Varios estudio riba un gama amplio di temanan a wordo realisa, cualnan Aruba y e otro islanan ta usando pa asina stimula e empresanan chikito y mediano. Na Aruba e projecto a wordo implementa conhuntamente entre Departamento di Asunto Economico y Camara di Comercio di Aruba.
E programa di COSME ta yega na su fin awor na september 2018, pero tur e 12 LGO-nan den Caribe cu a participa den e programa ta desea pa continua cu e cooperacion y apoyo na e empresanan chikito y mediano.
Algun mandatario cu a atende e Summit ta diputado di Boneiro sr. Hubert Martis, Minister di Desaroyo Economico di Corsow, sr. Steven Martina y Minister di Salubridad, Agricultura y Asunto Humanitario di Turks and Caicos, sr. Edwin Astwood. Tambe a participa señora Vanessa Torre directora di Departamento pa Desaroyo Economico na Corsow, demas representantenan di gobierno di e diferente islanan, representantenan di e consultant di GOPA cu a administra e projecto di COSME y sra. Taiana Mora cu a elabora riba e posibilidadnan di cooperacion Post COSME. Sra. Maria Dijkhoff-Pita, directora di Departmanto di Asunto Economico huntu cu su coleganan sra. Zulema Dabian-Erasmus y representantenan di e unidadnan IDEA y EXPRODESK tambe tabata presente.
Den su disertacion, Minister Ruiz-Maduro a resalta e importancia cu e progama COSME tabata tin pa nos empresanan chikito y mediano y a indica cu nos ta keda busca forma pa por sigui profesionalisa y stimula nos empresanan na Aruba. Den Gabinete Wever-Croes su vision economico empresanan chikito y mediano cu ta representa 93% di empresanan na Aruba, tin atencion special door di e impacto cu nan tin den nos economia. Minister Ruiz-Maduro ta gradici tur instancia cu a haci e Summit aki posibel, specialmente Departamento Economico pa tur nan esfuerso haci den cuadro di e programa COSME.