Minister di Economia Xiomara Ruiz-Maduro, hunto cu Stakeholders, ya desde mei ta desaroyando e areanan pa cual Aruba ta bay busca desaroyo economico. Den e ultimo añanan, Aruba no a conoce mucho desaroyo economico. Crecemento economico no ta un meta riba su mes pero si ta importante pasobra lo crea mas cuponan di trabou, negoshinan lo bay paga mas impuesto entre otro.
E ekipo di Minister di Asuntonan Economico hunto cu Stakeholders, a defini 5 area cu Gobierno di Aruba ta pensa cu lo mester enfoca riba nan y desaroya nan. Gobierno lo busca inversionistanan y lo percura tambe pa tur burocracia cu tin entorno di nan actualmente caba, wordo agilisa.
TURISMO:
E prome area ta Turismo. Tursimo ta nos pilar economico cu ta bayendo bon actualmente. Gobierno lo bay enfoca mas riba diversificacion di turismo. Aruba ta conta cu un bon infrastructura pa turismo. Nos tin un bon aeropuerto cu lo wordo expandi. Nos tin hotelnan. Aruba ya ta conoci riba mapa internacional pa turismo. Den vision economico di Gobierno, lo diversifica turismo cu cultura, deporte, cuido medico y bientestar, y te hasta cu mas aventura.
Pa cultura lo pone emfasis especialmente riba San Nicolas cu lo bira e centro cultural di Aruba. E parti di cuido medico y bienestar ta un aspecto cu lo haya hopi atencion y Aruba ta habri pa inverti pa inversionistanan cu kier inverti den turismo medico na Aruba. Cu e anuncio di Arubig ya nos ta den bon paso pa haya mas docter pa bin traha na Aruba y yuda mehora e cuido medico.
CONOCEMENTO ECONOMICO:
Esaki ta un economia basa riba conocemento na unda Universidad di Aruba lo wordo envolvi cu tur loke nan por ofrece y expande pa atrae bishitante y inversionistanan pa bin Aruba riba e tereno di innovacion y informacion technologico entre otro. Especialmente lo busca solucionnan pa islanan chikito. Ta e intencion pa exporta e ideanan aki y crea di esaki un crecemento economico. E desaroyonan cu nos conoce den technologia entre otro ta cu nos ta produci awa di hopi bon calidad. Esaki ta parti di technologia cu nos mester probecha pa exporta e conocemento y crea un crecemento economico rond di esaki.
AGRICULTURA:
Aruba tin un mercado hopi importante y interesante y nos por desaroya nos pais riba e tereno di agricultura. Mester promove producionnan local, produccionnan organico. E desafio mas grandi te ainda ta e awa y su costo. Cu e metodo innovativo y cu cooperacion necesario, lo logra surpasa e retonan aki tambe.
LOGISITICA:
Lo desaroya Aruba den un hub logistico pa aerolinianan den region y pa barconan crucero. E Proyecto Gateway 2030 di aeropuerto lo expande e posibilidadnan na aeropuerto.
BLUE ECONOMY:
Blue econonomy ta economia basa rib’e desaroyo y conservacion di e area marino. Lo haci uzo maximo di loke nos tin den nos area marino pa aporta na crecemento economico di nos pais.
Awo cu e 5 areanan aki a keda identifica, Gobierno di Aruba lo cuminsa busca inversionistanan cu tin mester pa e puntonan aki wordo reaslisa. Gobierno di Aruba ta trahando cu vision pa desaroya nos economia y trece mas bienestar y progreso pa nos pais.